Përgjigja pozitive e testit antidoping për mbrojtësin Jashahnica ka tronditur klubin e Skënderbeut, megjithatë në klub e dinin prej kohësh këtë gjë, ndërsa drejtuesit korcarë janë munduar të mbajnë gjithçka të fshehtë.
Ata prisnin vendimin e komisionit të antidopingut në UEFA për dënimin e tij, ndërsa shansi i fundit i Jashanicës ishte testi B, për të cilin si lojtari dhe klubi nuk japin sqarime.
Por, ku gaboi klubi i Skënderbeut në ditën e ndeshjes ndaj Jang Bojsit në “Elbasan Arena”, më 28 shtator 2017?
Gazeta Panorama ka mësuar nga burime të sigurta në klub të gjitha prapaskenat që çojnë tashmë në një dënim të lojtarit, i cili pritej të shitej nga klubi në merkaton e janarit.
ALERGJIA DHE GABIMI
Mëngjesin e së enjtes (28 shtator 2017), Jashanica ishte i mbushur në trup me puçrra, si pasojë e një alergjie. Kjo ka shtyrë stafin mjekësor të përdorë te kosovari atë substancë antialergjike që rezulton në listën e dopingut të UEFA-s. Në kushte kur Jashanica ka qenë në një gjendje të rënduar, është parë e domosdoshme marrja e këtij medikamenti në formë injeksioni për të stabilizuar situatën, në mënyrë që deri në mbrëmje, kur luhej takimi, lojtari të ishte gati.
Kjo substancë shkakton qetësi dhe debulesë, teksa është futur vetëm në vitet e fundit në listën e barnave të ndaluara nga UEFA. Një gjë e tillë dyshohet se nuk ka qenë në dijeni nga stafi mjekësor i Skënderbeut dhe për pasojë, është përdorur te lojtari. Gabimi tjetër i pafalshëm është fakti se kanë kërkuar vetëm në fund të takimit të bënin deklaratën në UEFA për gjendjen e lojtarit, pikërisht kur ai ishte përzgjedhur nga komisioni antidoping për të bërë testin.
Në rast se gjithç- ka do të deklarohej në kohë, atëherë lojtari shpëtonte. “Në përgjithësi, të gjitha ilaçet e alergjisë kanë kortizon, ashtu si prednizoloni. Gabimi ka nisur që me mosnjohjen e faktit që ky ilaç është në listën e të ndaluarave nga UEFA. Gafa tjetër është që kur i ka rënë shiriti për kontroll lojtarit, duhet ta kishin shkruar që ka marrë këtë medikament për këtë arsye dhe për kaq kohë”, tregon një burim i sigurt në klub, për atë që nuk ka shkuar në 28 shtator.
SA MUND TË DËNOHET
Jashanica rrezikon minimalisht 1 vit pezullim nga të gjitha aktivitetet. Sipas rregullores së UEFA-s, për përdorimin e këtyre substancave dënimi maksimal shkon dy vite pezullim. Tashmë duhet pritur përgjigjja përfundimtare e komisionit antidoping në UEFA, teksa lojtari dhe klubi presin që të jepet një masë pezullimi sa më e vogël, për më tepër që substanca është marrë në kushte mjekimi dhe nuk bëhet fjalë për një medikament që stimulon rritjen e gjendjes fizike.
