Një përforcim i rëndësishëm për ekipin e Vllaznisë gjatë kësaj jave është Ildi Gruda. Sulmuesi ka lënë pas problemet fizike dhe tashmë është bashkuar me grupin dhe ngarkesa për të ka qenë e zakontë si për gjithë lojtarët e tjerë.
24-vjeçari qëndron prej më shumë se 5 javësh larg fushave të lojës. Ish-futbollistit të Teutës iu ripërsërit dëmtimi në gju që e vuante nga fundi i sezonit të kaluar. Patjetër rikthimi i tij kënaq në radhët e kampit shkodran, që kanë një “armë” më tepër për vijimësinë e sezonit.
Dhe në një moment ku diskutohet dhe përflitet shumë se Dodaj është pranë largimit, rikthimi i Grudes vjen në momentin e duhur. Pavarësisht se numri 7-të i ka pasur minutat e pakta këtë edicion, ai ka arritur ta gjejë dy herë golin me kuqeblutë.
Kjo në fitoren 3-4 ndaj Tiranës dhe 2-1 kundër Teutës, ku në këtë të fundit Gruda ishte vendimtar me golin e tij në limitet e ndeshjes. Sezonin e shkuar shkodrani ishte një ndër elementet më të spikatur te Vllaznia. Ku arriti të shënonte plot 8 gola, duke qenë golashënuesi i dytë i skuadrës pas Bekim Balajt. Me ish-sulmuesin e Kombëtares që shënonte 17 gola duke fituar edhe “Këpucën e Artë” në fund.
