Erdhi si një blerje ‘top-player’, por dëmtimet dhe karakteri që ka belgu nuk e kanë lejuar deri tani që të tregojë sa vlen. Radja Nainggolan është duke kaluar një moment të vështirë te zikaltërit, pasi ka marrë një dënim shembullor, me pezullim dhe gjobë për shkak të vonesave në stërvitje.
Mediat në Itali raportojnë se mesfushori belg e ka pritur shumë keq vendimin e klubit zikaltër dhe me disa prej miqve të tij në Romë ka shfryrë, duke zbrazur dufin në disa mesazhe të shkëmbyera.
Nainggolan kërkon hakmarrje: “Do e tregoj në fushë sa vlej dhe pastaj do vijnë të më lëpihen ata intervistë që po më kritikojnë”.
Nuk mbaron me kaq, sepse duket se belgu është penduar që la Romën për Interin dhe është gati të kthehet në kryeqytet.
“Tottin e kam mik, ndoshta ndërhyn ai për rikthimin tim, edhe pse e di mirë që do bëhet rrëmujë e paparë nëse kërkoj largimin nga Interi”, shfryn Nainggolan, gjithnjë e më shumë “mish i huaj” në Milano, ku u prit si goditja e madhe e merkatos verore.
Por duket se nuk është vetëm vonesa e panumërt në stërvitje në qendër të pezullimit me kohë të pacaktuar të Radja Nainggolan. Në fakt, ka më shumë dhe bëhet fjalë për një natë të gjatë në diskotekë, duke festuar pavarësisht barazimit zhgënjyes kundër Chievo, me një paraqitje për tu harruar të belgut. Ajo që precipitojë situatën, sipas burimeve brenda klubit, është edhe një takim i rrezikshëm me tension të lartë me disa eksponentë të ultrasve zikaltër, aspak miqësor duke parë situatën e skuadrës e të Nainggolan mbi të gjithë.
Vonesa që pasoi në stërvitjen e mëngjesit ishte vetëm pika që derdhi gotën, me Marotta që nuk mund të mos e ndëshkonte lojtarin për mungesën e përsëritur të respektit ndaj skuadrës, shoqërisë e tifozëve përpara ndeshjes së rëndësishme me Napoli.
