Djemtë e gazetarit të vrarë, Jamal Khashoggi kanë lëshuar një apel emocional për rikthimin e trupit të babait të tyre. Ata kanë dhënë intervistën e tyre të parë, që nga vrasja e copëtimi i trupit të gazetarit në konsullatën e Arabisë Saudite në Stamboll, një muaj më parë.
Salah dhe Abdullah Khashoggi, të cilët e quajtën të atin e tyre “guximtar, bujar dhe shumë të zotin”, thanë se kanë kaluar javë të mbushura me ankth dhe pasiguri lidhur që pas zhdukjes së të atit.
“Shpresoj që çfarëdo që ndodhi, nuk ishte e dhimbshme për të, ose ishte e shpejtë. Ose, të kishte pasur një vdekje paqësore”, tha 33-vjeçari Abdullah Khashoggi gjatë një intervistë për CNN.
Autoritetet në Turqi vijojnë kërkimet për trupin e gazetarit. Më parë këtë javë, zyra e kryeprokurorit tha se trupi i Khashoggi u shpërbë pasi u mbyt, ndërsa Washington Post raportoi se hetuesit po shqyrtonin teorinë se trupi u shpërbë në acid. Një burim i afërt me Pallatin Mbretëror Saudit ka mohuar çdo njohuri mbi vendndodhjen e trupit.
Pa trupin e babait të tyre, vëllezërit thonë se familja e tyre nuk është në gjendje të vajtojë për të. “Gjithçka që duam tani është ta varrosim në Al-Baqi (varreza) në Medinë (Arabinë Saudite) me pjesën tjetër të familjes së tij. Fola për këtë me autoritetet saudite dhe shpresoj që të ndodhë shumë shpejt,” tha Salah.
Abdullah dhe Salah thonë se babai i tyre është keqkuptuar dhe qëllimisht keqinterpretuar për arsye politike.
“Jamal ishte një person i moderuar, i pëlqente të gjithë, kishte dallime dhe vlera të përbashkëta me të gjithë,” tha Salah, duke e përshkruar Khashoggin si një person të vërtetë, të lumtur dhe një baba të mrekullueshëm.
“Unë shoh shumë njerëz që vijnë tani dhe përpiqen të kërkojnë trashëgiminë e tij dhe për fat të keq disa prej tyre po e përdorin atë në një mënyrë politike, me të cilën ne nuk jemi aspak dakord.”
“Opinioni publik është i rëndësishëm … por frika ime është se është duke u politizuar. Njerëzit po hedhin analiza që mund të na drejtojnë larg nga e vërteta”.
I pyetur se si duhet të mbahet mend Khashoggi, Salah u përgjigj: Si një njeri i moderuar që ka vlera të përbashkëta me të gjithë … një njeri që e donte vendin e tij, i cili besonte aq shumë në të dhe potencialin e tij. Jamal nuk ishte disident, ai besonte në monarkinë se është gjëja që e mban vendin bashkë dhe beson në transformimin që po kalon.”
Duke reflektuar mbi karrierën e babait të tyre si gazetar, ata thonë se Khashoggi ishte “si një yll rock dhe roll” kur ata ishin me të në Arabinë Saudite.
“Ai ishte një figurë publike që pëlqehej nga të gjithë të tjerët”, tha Salah. “Ju nuk e shihni këtë gjë kaq shumë në media, në mediat e shkruara.”/ TIRANA TODAY
