Rexhep Rraja, djali i deputetit socialist Rrahman Rraja është shpallur në kërkim nga Policia për ngjarjen e ndodhur dy ditë më parë në Fushë Krujë-Thumanë, ku u rrahën barbarisht dy kushërinjtë Maja. Autoritetet reaguan vetëm pas publikimit të videos në media.
Disa anëtarë të fisit Rraja dhe persona të lidhur me ta janë shoqëruar e arrestuar, kurse djali i deputetit çuditërisht nuk është lokalizuar dot.
Një eksponent i njohur në zonë dhe gjithashtu edhe në procesverbalet e Policisë së Shtetit, Rexhep Rraja edhe pesë vite më parë ka qenë protagonist në një ngjarje të rëndë që përfshiu për muaj me radhë dhe politikën.
Prej kohësh ai kërcënonte dhe dhunonte të dashurën e tij Xhisiela Maloku, vetëm se kjo e fundit kërkonte të ndahej nga djali i deputetit. Ajo kishte shkuar disa herë në Komisariat, por fisi Rraja kishte ndikim të fortë në zonë për shkak të deputetit Rrahman Rraja dhe kallëzimi i saj nuk merrej.
Ishte ish-oficeri Emiljano Nuhu që bëri publike dëshminë dhe rastin e Xhisiela Malokut, duke u larguar më pas jashtë vendit, që hodhi dritë mbi rastin e Fushë Krujës.
Vajza e një familje të varfër në atë zonë, shpjegonte në dëshminë e saj të Korrikut 2018 se në shumë raste ishte detyruar nën presionin e dhunës, kërcënimeve verbale dhe me armë në kokë, të tërhiqej në momentet e fundit, sa herë që ka shkuar për të bërë kallëzim në disa komisariate policie.
Madje, nga deklarimet e saj, doli se fisi Rraja e kishte komisariatin e policisë si derë shtëpi. Sapo ajo shkonte për kallëzim, lajmi shkonte më parë te familja dhe fisi i deputetit dhe ata shkonin atje para se dokumentet të mbylleshin. Në këto kushte, dëshmia e Xhisiela Malokut nuk ishte përfunduar asnjëherë.
“Nuk guxoja të dilja nga zyra e oficerit Gentjan Çitozi, se ishin disa persona të tjerë dhe ma bënin me shenjë që do të vrasim në qoftë se nuk tërheq kallëzimin. Personat rrinin në ambientet e Policisë Fushë-Krujë.Dua të shpjegoj që aty më morën një avokat dhe një psikologe kundër dëshirës sime dhe më thoshin:
Ti je budallaçkë dhe do të firmosësh deklarimin që do të përpilojë oficeri Gentjan Çitozi, se është miku jonë”. Unë ndenja rreth dy orë duke mos e firmosur deklarimin, por ishte e pamundur se po më kërcënonin me pistoletë. Më nxirrnin jashtë zyrës dhe i thoshin oficerit: ‘Na e lër ne se e rregullojmë”, shprehej ajo në dëshmi.
