Prej 18 vitesh, që nga përfundimi i luftës së fundit në Kosovë, janë ende 16 mijë persona, fati i të cilëve nuk dihet ende.
Sot, me rastin e Ditës Kombëtare për Personat e Pagjetur, do të organizohet një aksion simbolik nga Nisma e të Rinjve për të Drejtat e Njeriut (Kosovë), në sheshin Ibrahim Rugova në Prishtinë.
Mijëra familje vazhdojnë të jetojnë me mohimin e së drejtës për të ditur të vërtetën dhe me plagët e luftës, që vazhdojnë të jenë të hapura për ta.
Familjarët duket se e kanë humbur shpresën se një ditë do ta mësojnë të vërtetën mbi fatin e të afërmve të tyre, si dhe shprehen se qeveritë e pasluftës e kanë neglizhuar këtë çështje.
Qeveria e Kosovës ka dështuar ta fusë këtë temë në dialogun e Brukselit, për shkak të mosinteresimit të palës serbe.
“Ne insistojmë që shoqëria kosovare nuk do të mund të arrij tek një paqe e qëndrueshme dhe pajtim pa u adresuar çështjet që lidhen me luftën, përfshirë fatin e personave të pagjetur”, shprehen aktivistë të Nisma Ime.
