Gjykata Speciale do të vijojë edhe sot me dëgjimin e argumenteve të mbrojtes kundër pretendimeve të prokurorisë specialë qëa akuzon Hashim Thacin, Kadri Veselin, Jakup Krasniqin dhe Rexhep Selimin për krime lufte dhe krime kundër njerëzimit. Sot fjalën e saj ka mbrojtja e Jakup Krasniqit. Ende nuk dihet nëse zoti Krasniqi do të preferojë të japë dhe ai një mesazh në seancën e sotme.
Ndërkohë që të martën fjalën e kishte mbrojtja e Thacit, Veselit dhe Selimit. Vetë Hashim Thaçi tha se tani është vërtetuar se as ai e as UÇK-ja nuk kanë kryer veprën e trafikimit të organeve – akuzë e bërë nga senatori i atëhershëm zviceran, Dick Marty, që u konkretizua në një raport të Këshillit të Evropës më 2011. Pikërisht ky raport ishte pikënisja e thirrjeve për themelimin e Dhomave të Specializuara, institucion që deputetët e Kuvendit të Kosovës e themeluan më 2015.
“Bota tani e di sot si rezultat i këtij procesi se nuk kishte trafikim organesh dhe se Shtëpia e Verdhë nuk ka ekzistuar kurrë. Tani e dimë se edhe unë edhe UÇK-ja, populli i Kosovës dhe gjithë shqiptarët jemi shfajësuar nga këto akuza. E vërteta është thënë dhe rreja e zezë mbi Kosovën është hequr. Pra, kjo sakrificë ja ka vlejtur”, tha Thaçi.
Pak kohë pas deklarimit të Thaçit, para trupit gjykues foli edhe Rexhep Selimi, që në kohë të luftës, sipas Gjykatës Speciale në Hagë, kishte qenë Inspektor i Përgjithshëm i UÇK-së. Selimi tha se nuk ka frikë nga drejtësia, por nga padrejtësia duhet të kemi frikë të gjithë, ndërsa u shpreh i bindur se së bashku me bashkëluftëtarët e tij do të klthehen të pafajshëm në Kosovë.
Avokatët e Hashim Thaçit gjatë deklaratave hyrëse argumentuan se klienti i tyre, duke mbajtur postin e drejtorit politik të UÇK-së, e më vonë të kryeministrit të Qeverisë së Përkohshme, nuk kishte pasur përgjegjësi e as nuk e kishte kontrolluar UÇK-në.
Ai tha se pretendimet e Zyrës së Prokurorit të Specializuar se Thaçi, dhe të akuzuarit e tjerë, udhëhiqnin një “ndërmarrje të përbashkët kriminale” që synonin të merrnin kontrollin e Kosovës, nuk qëndrojnë.
Në ditën e dytë të gjykimit, deklaratën hyrëse e bëri edhe Ben Emmerson, avokati i të akuzuarit Kadri Veselit, që në luftë kishte udhëhequr drejtorin e zbulimit të UÇK-së.
Emmerson argumentoi se ndaj klientit të tij nuk ka as prova e as dëshmitarë që e lidhin atë me ndonjë prej krimeve të pretenduara në aktakuzë.
“Nuk ka asnjë provë që ai të ketë autorizuar apo të ketë nxitur ndonjëherë ndonjë krim apo ndonjë politikë kriminale. Që ai të ketë marrë ndonjëherë në cilësinë si shef i zbulimit ndonjë raportim të ndonjë krimi të kryer apo që ai të ketë luajtur ndonjëherë çfarëdolloj roli në ngjarjet që kanë çuar në kryerjen e ndonjë krimi. Pra, nuk ka asnjë provë për këto pika. Fare”, theksoi Emmerson.
Ndërkaq, Geoffrey Roberts, mbrojtësi i Selimit, tha se Zyra e Prokurorit të Specializuar po sulmon trashëgiminë e UÇK-së.
Ai tha se nuk ka asnjë provë ndaj klientit të tij, që vërtetojnë se ai ka qenë pjesë “e ndërmarrjes së përbashkët kriminale”, siç pretendon ZPS-ja.
“Në aktakuzë nuk ka aludime që Selimi ka urdhëruar ndonjë krim.Provat nuk dëshmojnë se Selimi ka kontribuar në emër të një plani të përbashkët kriminal”, tha ai, duke iu bashkuar edhe ekipeve të tjera mbrojtëse që argumentuan se UÇK-ja ishte një forcë guerile, pa strukturë të mirëfilltë udhëheqëse.
Ekipet mbrojtëse argumentuan se ish-krerët nuk kishin udhëhequr ndonjë fushatë përndjekjeje as ndaj Lidhjes Demokratike të Kosovës e as ndaj kundërshtarëve të tjerë të perceptuar të UÇK-së, siç pretendon organi i ndjekjes.
Bazuar në kalendarin e Dhomave të Specializuara, seancat gjyqësore do të vazhdojnë më datat 11, 12, 13 dhe 17, 18, 19 e 20 prill.
