Komsioni i Disiplinës ka në mbledhjen e zhvilluar ditën e sotme ka marrë masat ndëshkimore për sjelljet e gabuara të javës së parë pas minifazës përgatitore të janarit. Me dorë të hekurt është dënuar trajneri i Partizanit për sjellje josportive ndaj arbitrit të ndeshjes në përballjen me Flamurtarin. Sulejman Starova do të përjashtohet 8 javë nga aktiviteti, pasi ka fyer arbitrin Enea Jorgji, për atë penallti të dhënë në minutat e fundit në Vlorë. Disiplina kishte paralajmëruar edhe më parë Starovën që në rast se përsëritet kjo sjellje dënimi do të ishte i rreptë.
Lojtari i Skënderbeut, Marko Radas, është dënuar me dy ndeshje pezullim dhe një gjobë prej 1 milionë lekësh për sjellje ofenduese dhe fair play, në përballjen me Luftëtarin, ku bardhekuqtë u mposhtën me rezultatin 2-0. Edhe Lushnja dënohet me gjobë 2 milionë lekë për shkak të tifozëve, të cilët në një moment të caktuar ndërprenë ndeshjen e një jave më parë.
Ja vendimet e plota të Komisionit të Disiplinës:
1-Zyrtari i KF “Partizani”,Sulejman Starova, për sjellje jo sportive ndaj zyrtarit të ndeshjes dhe për përsëritje të shkeljeve disiplinore, në bazë të nenit 40/1 dhe 49/2/a) të KDS, dënohet me 8(tetë) ndeshje pezullim nga aktiviteti.
2-Lojtari i KF “Skënderbeu”, Marko Radas, për sjellje ofenduese dhe fair play, në bazë të nenit 56/1.a) të KDS, dënohet me 2(dy) ndeshje pezullim nga aktiviteti dhe gjobë në masën 100.000 (njëqind mijë) lekë.
3-KF “Lushnja”, për sjellje të gabuar të spektatorëve duke shkaktuar ndërprerjen e ndeshjes, në bazë të nenit 66/2 të KDS, dënohet me gjobë në masën 200.000 (dyqind mijë) lekë.
4-Zyrtari i KF ”Flamurtari” U-17, Sherif Idrizi, për protesta ndaj vendimeve te zyrtarit te ndeshjes, në bazë të nenit 56/1.a) të KDS, dënohet me 2(dy) ndeshje pezullim nga aktiviteti dhe gjobë në masën 100.000 (njëqind mijë) lekë. Në zbatim të nenit 136/1/b) të KDS, gjoba aplikohet në masën 3%.
