Reshjet intensive të shiut që kanë përfshirë qarkun Shkodër këtë të martë, më 18 nëntor, kanë krijuar situata të ndryshme problematikash në territorin e bashkive të qarkut, duke nisur nga problemet me energjinë elektrike, rrugë të bllokuara apo rënie gurësh dhe dherash.
Bashkia Shkodër
Në këtë bashki situata paraqitet e qetë dhe nuk raportohet asnjë problem me energjinë elektrike. Reshjet vijojnë me intensitet mesatar, por deri tani nuk janë evidentuar vështirësi serioze. Në fshatin Gimaj, njësia administrative Shalë, është zhbllokuar një pjesë e rrugës, dhe automjetet që ishin të bllokuara kanë kaluar pa problem. Pastrimi i plotë i akseve rrugore, përfshirë segmentin Ndërlysaj – Breg Lumi, do të vijojë edhe ditën e nesërme.
Bashkia Malësi e Madhe
Në qytetin e Koplikut situata ka qenë e rënduar për shkak të reshjeve të shiut, por momentalisht gjendja paraqitet e normalizuar. Punonjësit e bashkisë janë në terren duke hapur dhe pastruar pusetat për të shmangur bllokimet.
Bashkia Vau Dejës
Reshjet vijojnë me intensitet mesatar, ndërsa lokalisht shfaqen me intensitet të lartë. Në disa njësi administrative si Hajmel, Vig-Mnelë, Temal dhe Shllak raportohet mungesë e energjisë elektrike.
Bashkia Pukë
Vijojnë reshjet intensive të shiut në të gjithë territorin. Mungesa e energjisë elektrike është sporadike, ndërsa në fshatin Lumzi, njësia administrative Rrapë, energjia nuk është rikthyer që prej mesditës.
Bashkia Fushë-Arrëz
Në këtë bashki reshjet vijojnë me intensitet të lartë. Ka rënie gurësh dhe dherash në disa segmente të rrugëve rurale. Disa fshatra në njësitë administrative Iballë dhe Qafë Mali po përballen me ndërprerje të energjisë elektrike.
Autoritetet lokale dhe ekipet e emergjencës janë në terren për të garantuar sigurinë e banorëve dhe për të rivendosur shërbimet e ndërprera.
