Bernard Berisha është përforcimi më i fundit i Dinamo City në prag të ndeshjes Play-Off ndaj Jagiellonia në Conference League. Prezantimi i tij është bërë në ambientet e klubit, ndërsa fotot janë shpërndarë në rrjetet sociale, teksa futbollisti është shoqëruar nga presidenti Bardhi.
“Bernard Berisha, dhurata e madhe e presidentit Adrian Bardhi për trajnerin Ilir Daja, ka bërë edhe prezantimin me fanellën e Dinamo City, pas akordit të arritur disa ditë më parë. Sulmuesi i njohur për kualitetin dhe eksperiencën e tij, i bashkohet skuadrës dinamovite para ndeshjeve të Play-off-it të Conference League kundër polakëve të Jagiellonias”, shkruhet në njoftimin e bërë.
Berisha ka një karrierë të pasur, ndërsa kjo nuk është hera e parë që transferohet në kampionatin shqiptar, pasi më herët ka mbajtur veshur fanellën e Skënderbeut dhe Besës. Për afro 1 dekadë është aktivizuar në kampionatin rus të futbollit, teksa prej vitit 2015 është pjesë e përfaqësueses së Kosovës. Bernard Berisha do të jetë në dispozicion të trajnerit Daja për ndeshjen e radhës në Evropë ndaj polakëve të Jagiellonias.
