Autoritetet në Argjentinë kanë dalluar sinjale, të cilat mendohet se i përkasin nëndetëses argjentinase që u zhduk me 44 persona në bord.
Aktualisht po tentohet që të përcaktohet vendndodhja e këtyre sinjaleve, ndërsa kanë nisur kërkimet në Atlantikun jugor.
Po ashtu, kërkimeve i është bashkuar edhe një avion i NASA-s.
Kontakti i fundit i nëndetëses “Ara San Juan” me marinën ishte 430 km larg bregut, të mërkurën në mëngjes.
Edhe Britania dhe vende të tjera në rajon kanë ofruar ndihmë për kërkimin e nëndetëses, ndërsa mendohet se ajo mund të ketë pasur probleme në komunikim për shkak të ndonjë defekti elektrik.
Kërkimet janë vështirësuar për shkak të erërave të forta dhe dallgëve të mëdha, ndërsa sipas ekspertëve, nëndetësja duhet të dalë në sipërfaqe në momentin që humb komunikimin.
