Prej më shumë se dy javësh Spanja po përballet me zjarret masive, të cilat nuk janë përjetuar për më shumë se 20 vjet. Mijëra hektarë janë djegur duke pamundësuar ndërhyjen e helikopterëve dhe avionëve si pasojë e tymit.
Zjarret e mëdha në Spanjë u përhapën në shpatet jugore të vargmalit Picos de Europa të hënën duke detyruar autoritetet të mbyllin një pjesë të rrugës së njohur të pelegrinazhit Camino de Santiago.
Rreth 20 zjarre, të nxitura nga një valë e fortë nxehtësie 16-ditore, kanë shkatërruar më shumë se 115,000 hektarë në rajonet e Galicias dhe Castile and Leon gjatë javës së kaluar.
“Kjo është një situatë zjarri që nuk e kemi përjetuar në 20 vjet,” tha Ministrja e Mbrojtjes Margarita Robles.
Ajo tha se tymi i dendur po ndikonte në punën e helikopterëve dhe avionëve që transportonin ujë. Zjarret kanë karakteristika të veçanta si rezultat i ndryshimeve klimatike dhe kësaj vale të madhe nxehtësie.
Ushtria spanjolle ka vendosur 1,900 trupa për të ndihmuar zjarrfikësit.
Autostradat dhe shërbimet hekurudhore janë ndërprerë.
Ministria e Brendshme thotë se 27 persona janë arrestuar dhe 92 janë nën hetim për zjarrvënie të dyshuar që nga qershori.
Evropa Jugore po përjeton një nga sezonet e saj më të këqija të zjarreve në dy dekada, me Spanjën midis vendeve më të goditura.
Në Portugali, zjarret kanë djegur 155,000 hektarë deri më tani këtë vit, sipas institutit të mbrojtjes së pyjeve – tre herë më shumë se mesatarja për këtë periudhë midis viteve 2006 dhe 2024. Rreth gjysma e asaj zone u dogj në tre ditët e fundit.
Vala e të nxehtit është e treta më e nxehtë që nga viti 1975, kur agjencia kombëtare e motit filloi t’i monitorojë ato. Pjesa më e madhe e vendit është subjekt i paralajmërimeve për zjarre në pyje.
