Një incident i pazakontë ka ndodhur në Dibër më 6 maj, kur monumenti i heroit kombëtar Gjergj Kastrioti Skënderbeu është përdhosur me simbole të Partisë Demokratike, pikërisht në 620-vjetorin e Ditës së Emrit të tij dhe gjatë festimeve për Shëngjergjin.
Ngjarja u shënua në Njësinë Administrative Kastriot, ku banorët po përgatiteshin për ceremonitë tradicionale të kësaj dite të shënuar. Simbolet elektorale të PD-së, të vendosura mbi monumentin e Skënderbeut, shkaktuan shqetësim dhe indinjatë mes komunitetit lokal.
Në reagim të menjëhershëm, banorët ndërhynë vetë për të pastruar dhe rikthyer monumentin në gjendjen e tij të mëparshme, pak orë përpara nisjes së ceremonisë zyrtare të organizuar nga autoritetet vendore.
