Dalin detaje të reja rreth ngjarjes që përfshiu dy djemtë e ish-missit të njohur shqiptar, Valbona Selimllari, të cilët u arrestuan nga Policia e Tiranës pas një episodi të dhunshëm ndaj një efektivi policie.
Sipas informacionit të ri të konfirmuar nga burime pranë hetimit, Deni dhe Kejni Selimllari, përkatësisht 21 dhe 18 vjeç, ndodheshin në një nga lokalet e natës në zonën e njohur të Bllokut në kryeqytet, në gjendje të dehur. Të rinjtë kishin filluar të bërtisnin dhe të shkaktonin rrëmujë brenda lokalit, duke shqetësuar klientët dhe stafin.
Më pas kamarierët janë detyruar t’i nxjerrin jashtë për shkak të sjelljes së tyre të papërshtatshme. Por edhe pasi janë nxjerrë jashtë, situata nuk është qetësuar. Djemtë kanë vijuar me zhurma, britma dhe ofendime në rrugë.
Në ato momente është afruar një punonjës policie, i cili u përpoq t’i qetësonte, por është përballur me sjellje të dhunshme nga të rinjtë. Sipas raportimeve, ata kanë ofenduar dhe më pas kanë goditur me grushte efektivin e policisë. Menjëherë është thirrur patrulla e Komisariatit Nr. 2, e cila ndërhyri dhe i shoqëroi të rinjtë në ambientet e komisariatit.
Por edhe atje, sjellja e tyre ka vijuar të jetë e dhunshme. Ata kanë thyer një kamerë sigurie, dëmtuar derën e dhomës së shoqërimit dhe kanë kërcënuar punonjësit e policisë.
