Dalin në dritë detaje të reja dhe tronditëse nga vrasja makabre e biznesmenit italian Edoardo Sarchi, 44 vjeç, ngjarje e ndodhur pak ditë më parë në zonën e Salari-t në Tepelenë.
Burime nga grupi hetimor bëjnë me dije se rezultatet paraprake të autopsisë kanë hedhur dritë mbi mënyrën e dhunshme se si është ekzekutuar shtetasi italian. Sipas ekspertizës mjeko-ligjore, Sarchi nuk është vrarë menjëherë me armë zjarri, siç dyshohej fillimisht.
Sipas të dhënave të deritanishme, rezulton se para se të qëllohej me armë zjarri në këmbë, viktima është goditur me një mjet të fortë, dyshohet dru ose shufër, në pjesën e kokës. Goditja i ka shkaktuar humbje të menjëhershme të ndjenjave, duke e lënë pa ndihmë në tokë.
Pasi ka humbur ndjenjat, autori (apo autorët) e kanë qëlluar më pas me armë zjarri në këmbë. Edhe pse plumbi nuk ishte i menjëhershëm për jetën, gjakderdhja e madhe ka rezultuar fatale, duke i shkaktuar vdekjen viktimës disa minuta më vonë.
Grupi hetimor po punon për të zbardhur plotësisht motivet e vrasjes, ndërsa janë marrë në pyetje disa persona që kishin kontakte të afërta me viktimën.
Të shoqëruarit janë Eqerem Braçi së bashku me dy djemtë e tij, Daniel dhe Gazmend Braçin, si dhe dy persona të tjerë. Gjatë marrjes në pyetje ata kanë dhënë versione të ndryshme të ngjarjes, duke ngritur dyshime. Një nga pistat kryesore lidhet me një konflikt të mundshëm pronësor apo financiar, për të cilin italianit mund t’i jetë bërë pritë.
Ndërkohë, policia ka sekuestruar kamerat e sigurisë në zonën përreth dhe po punon për identifikimin e autorit apo autorëve të përfshirë në krim.
Edoardo Sarchi ishte një sipërmarrës italian në fushën e përgatitjes së tullave dhe tjegullave dhe kishte kohë që frekuentonte zonën e Jugut të Shqipërisë për gjueti.
Ndërkohë që hetimet janë në fazë intensive, autoritetet shqiptare janë në bashkëpunim të ngushtë me ambasadën italiane dhe organet e drejtësisë në Itali.
