Pas eliminimit nga Botërori tek Gjermania pritej që të kishte një revolucion të madh. Ajo shfaqje turpi në tre ndeshjet e fazës së grupeve la përshtypjen se do të “priteshin” shumë koka. Por nga ajo humbje me Korenë e Jugut, ku trajneri Joachim Low la shumë dyshime për të ardhmen gjërat kanë ndryshuar.
Ai do të vazhdojë të udhëheqë katër herë kampionët e botës dhe do të jetë ai që do të rindërtojë skuadrën për Europianin e ardhshëm. Federata gjermane e Futbollit (DFB), pas disa ditësh reflektimi vendosi që të konfirmojë 58-vjeçarin në pankinë, për të vijuar punën me skuadrën kombëtare.
Lajmi u publikua nga e përditshmja gjermane “Bild”, sipas së cilës ende nuk ka një komunikatë të Federatës në lidhje me këtë çështje, por presidenti dhe bordi drejtues i saj nuk e vunë në dyshim asnjëherë pozicionin e trajnerit 58-vjeçar.
Joachim Löw kishte rinovuar kontratën e tij me kombëtaren para nisjes drejt Rusisë deri në vitin 2022, që luhet edhe Botërori i Katarit. Tani, detyra e tij është të bëjë që Gjermania të harrojë sa më shpejt eliminimin nga Kupa e Botës, e të fillojë të mendojë fillimisht për Europianin e 2020-s dhe më pas për Botërorin e Katarit.
