Në Korçë pati një tubim masiv kundër dënimit të mundshëm të Skënderbeut nga UEFA dhe u nënshkrua një peticion i cili do tu dorëzohet atyre. Të shumtë ishin njerëzit që dolën në rrugë me pankarta në duar dhe me thirrjet “mos na e prisni ëndrrën” e “ Qyteti i Korçës jeton me futbollin”.
Presidenti i Skënderbeut, Ardjan Takaj nuk ka qenë i pranishëm në këtë tubim, pasi ai është detyruar të udhëtojë drejt Gjenevës për të arritur marrëveshjen me një studio avokatie që do të marrë në dorë çështjen. I kontaktuar nga newsport.al, Takaj falënderuar përzemërsisht të gjithë ata që dolën sot në shesh duke protestuar për akuzat e ngritura nga inspektorët e UEFA-s. Ai thekson edhe faktin se në këtë dënim të mundshëm ka shumë prapaskena, por që klubi ka vendosur tu shkojë deri në fund.
Si ndiheni pas gjithë asaj pjesëmarrje në tubimin paqësor të qytetarëve korçarë?
Jam shumë i emocionuar pasi ishte një pjesëmarrje mbështetëse shumë e madhe dhe kjo e ka një logjikë. Jemi prej 8 vitesh bashkë dhe kjo është gjë e mirë pasi korçarët e kanë mbështetur Skënderbeun në kohë dhe momente të vështira. Ne jemi pjesë e përbashkët brenda dhe jashtë vendit.
Ka prapaskena?
Nuk diskutohet që ka prapaskena, por ne po merremi seriozisht me çështjen pasi unë vetë jam në Gjenevë. Do ta çojmë këtë çështje deri në fund dhe duhet të trajtohemi si europianë dhe jo si shqiptarë.
A keni marrë avokat?
Po, kemi marrë një studio në Gjenevë.
Kur thoni prapaskena, nga kush?
Po nuk diskutohet që ka prapaskena pasi nuk mund të shpërndahen dokumente ashtu në media pa u përfunduar procedurat ligjore sepse ka të bëjë me emrin e ekipit. Pra, quhet fajtor pa qenë i tillë dhe dëmtohet imazhi. Si mund të flitet kështu para se të merret vendimi? Në asnjë vend të botës nuk ndodh kjo. Ne do ta shohim me prioritet dhe do të punojmë fort për suksesin për të mos njollosur emrin e ekipit. I falënderoj të gjithë që japin mbështetje për Skënderbeun dhe i falënderoj qytetarët korçarë për mbështetjen.
