Në një intervistë televizive, Deputetja e Partisë së Lirisë, Erisa Xhixho thotë se Partia e Lirisë nuk është e tërhequr asnjëherë nga aksioni opozitar dhe se ka qenë gjithmonë në protestat para bashkisë Tiranë dhe do të jetë e angazhuar edhe në protestën e 7 tetorit.
Xhixho deklaroi se para disa javësh u rrëzua me forcën e kartonit një vendim i Gjykatës Kushtetuese për rastin e Olta Xhaçkës, dhe se në momentin që rrëzohet një vendim i Kushtetueses është një puç kushtetues dhe se nuk mund të flitet më as për drejtësi dhe as për shtet ligjor.
Nga ana tjetër, ajo e cilësoi si dënim politik atë të dhënë ndaj deputetit demokrat Ervin Salianji dhe se qeveria donte të jepte mesazh qytetarëve duke përdorur drejtësinë, se kush denoncon dhe flet, do shkojë në burg.
Xhixho: Vendimi i Gjykatës Kushtetuese kërkonte shqyrtim në themel të rastit Xhaçka, për të cilin ka përfituar bashkëshorti i vetë si investitor strategjik me firmën e Kryeministrit.
Ky është një rast shumë i rëndë që duhet të kishte ndërgjegjësuar qytetarët, ndërkombëtarët dhe shoqërinë.
Pas kësaj ngjarje të rëndë, një javë pas rrëzimit të vendimit të Gjykatës Kushtetuese, kemi një dënim politik të kolegut Salianji.
Kemi një dënim të pabazuar në ligj. Zoti Salianji ka bërë një akuzë nga foltorja, për një super skandal të qeverisë socialiste, siç bëjmë të gjithë ne.
Kallëzimi i rremë publik nuk ekziston. Salianji nuk ka bërë kallëzim as në prokurori dhe as në polici.
Kush denoncon pjesëtarë të qeverisë apo familjarë të tyre shkon në burg, ku është shqetësimi.
Nuk shkon as për korrupsion, as për vjedhje, por se ka bërë një denoncim publik.
Por mesazhi që ka dashur të japë kjo mazhorancë, duke përdorur drejtësinë, për tu dhënë një mesazh qytetarëve se kush denoncon dhe do flasë, do vejë në burg.
Prokuroria kërkon dënim me 3 vite shërbim provë, ka qenë gjykata e Shkallës së Parë dhe Apeli që e dënuan me burg.
Kemi përdorimin e drejtësisë nga kjo mazhorancë në mënyrë flagrante.
Protesta e 7 tetorit duhet të ketë një ndërgjegjësim mbarëshoqëror, një pjesëmarrje të madhe.
Partia e Lirisë kanë mbledhur strukturat dhe po mobilizohet.
Do mblidhemi para kryeministrisë dhe më pas do shpërndahemi.
Qytetarët kanë qenë të prekur se kur i ndodh një gjë e tillë një deputeti, mund t’i ndodhë çdo qytetari.
Nuk është e lehtë të bësh opozitë në Shqipëri sot, nuk jemi në një situatë normale ku funksionon shteti ligjor, jemi në autokraci, rastet flagrante që folëm është kupa që është mbushur.
Aksioni i opozitës padyshim që do përshkallëzohej, në momentin që parlamenti ka humbur funksionimin e tij.
Jemi në qëndresë të vazhdueshme ndaj këtij regjimi.
