Juventus u mposht të martën në mbrëmje nga Real Madrid në çerekfinalen e parë të Champions League me rezultatin e thellë 3-0 në Torino. Legjenda e bardhezinjve, Del Piero ka kritikuar Massimiliano Allegrin për rreshtimin që bëri në fushë, duke u shprehur se nuk kishte mësuar asgjë nga finalja e një viti më parë. Po ashtu nuk i ka kursyer elozhet për yllin e madrilenëve, Cristiano Ronaldo i cili shënoi dy gola, ku njëri ishte ndër më të bukurit në historinë e këtij kompeticioni.
“Mesfusha e Real Madrid është më e forta në botë. Për momentin është një ekip kameleon, që di kur të sulmojë dhe kur të mbrojë”. Alessandro Del Piero e ka komentuar me këto fjalë disfatën e pësuar nga ish-skuadra e tij në “Allianz Stadium” kundër kampionëve në fuqi të Europës.
“Ronaldo është më i forti, po luan shumë mirë si qendërsulmues i pastër. Por është një numër 10-të sepse ka një ndikim te gjithë ekipi për mënyrën si luan”. Dybala mori karton të kuq, Higuain nuk pati asnjë ndikim: “Do të kritikohen, por Navas ka bërë një pritje të jashtëzakonshme ndaj Gonzalo-s, ndërsa Paulo ka provuar të bëjë diçka. Ai dhe Douglas Costa ishin të vetmit që i dhanë diçka më shumë Juventus-t në sulm”.
Në lidhje me Allegri-n, Del Piero ka shtuar: “Ka marrë komplimente shumë herë për zgjedhjet e tij, por mund të kishte bërë diçka ndryshe pas asaj që kemi parë në finalen e vitit të kaluar. Gjithsesi, duhet thënë se Real ndihet shumë mirë në këtë kompeticion dhe motivohet nga objektivi për ta fituar për vitin e tretë radhazi, që do të ishte një arritje historike. Juventus duhet ta harrojë këtë ndeshje dhe të shikojë përpara”. Në fund, Del Piero ka folur mbi të ardhmen e tij: “Nuk kam vendosur akoma se çfarë do të bëj. Profesioni i trajnerit më tërheq gjithmonë e më shumë, edhe pse janë të shumtë lojtarët e brezit tim që e bëjnë këtë”.
