Napoli ishte shumë pranë shpalljes kampion këtë sezon në Serie A, por disfata e Firences dhe triumfi i Juventusit në “San Siro” bëri që shpresat të veniteshin. Kjo disfatë ka bërë që një pjesë e mirë e yjeve napolitanë të mendojnë largimin nga ekipi për sezonin e ardhshëm.
Një ndër ata që pritet të largohet është edhe mbrojtësi i kombëtares shqiptare, Elseid Hysaj. 24-vjeçari me fanellën e kaltër u shndërrua në një ndër futbollistët më të mirë të linjës së djathtë, megjithatë e ardhmja e shkodranit mund të jetë larg Napolit. Këtë e ka pohuar edhe menaxheri i lojtarit, Mario Giuffreddi, i cili në një prenoncim për “CalcioNapoli24” ka zbuluar se janë tre klube të Premier Leagues që kanë shfaqur interes konkret për lojtarin e kombëtares sonë.
“Hysaj tek Chelsea? Elseidi kërkohet nga shumë klube në Premier League, madje 3 prej tyre kanë kryer lëvizje konkrete, megjithatë duhet parë sa të gatshëm janë për të paguar klauzolën e tij”, ka deklaruar Giuffredi, duke parashtruar edhe pikën kryesore të negociatave, që është pikërisht klauzola e largimit që Hysaj ka në kontratën e tij aktuale me klubin napoletan.
Më 2016-ën mbrojtësi kuqezi zgjati marrëveshjen me Napolin deri në vitin 2021 me opsion rinovimi edhe për një sezon tjetër, ndërsa në kontratë u përfshi edhe klauzola prej 50 milionë eurosh. Gjatë merkatos së verës, emri i Hysajt u përmend si pjesë e listës së dëshirave të Chelseat dhe Manchester Unitedit.
