“Pazari” i Juventusit në Madrid duket se nuk ka mbaruar me transferimin e Cristiano Ronaldos. Duket se shumë shpejt do të ketë një sulm tjetër nga bardhezinjtë që ti rrëmbejnë edhe një nga yjet e ekipit madrilenëve. Bëhet fjalë për mbrojtësin brazilian, Marcelon. Duket qartë që braziliani nuk ka aspak raporte të mira me trajnerin e ri, Lopeteguin dhe kjo mund të jetë një shtysë akoma më shumë.
“Ngela i befasuar nga zëvendësimi, por unë e respektoj vendimin e trajnerit. Doja të vazhdoja, sepse ndihesha 100%. Nuk e kuptoj zëvendësimin, por e respektoj, sepse është një vendim i trajnerit. Unë gjithmonë dua të luaj”. Këto ishin fjalët e Marcelo pas zëvendësimit që trajneri Lopetegui i bëri në një nga ndeshjet në kampionat, duke pranuar publikisht se mes tyre nuk ka raporte të mira.
Trajneri spanjoll nuk iu përgjigj me deklarata në media, por e dërgoi Marcelon të stërvitet me rezervat e Realit. Ky vendim i trajnerit duket se i ka përkeqësuar akoma më shumë marrëdhëniet mes tyre duke i hapur më shumë rrugët e largimit të mbrojtësit.
Mediat spanjolle kanë nisur menjëherë aludimet se pas sjelljes së Marcelos qëndron Juventusi, të cilët janë shumë të interesuar ta kenë në skuadër duke ditur kombinimin perfekt që ai ka me Ronaldon. Po ashtu flitet që Perez është duke diskutuar në fshehtësi të plotë me Juventusin për një shkëmbim të mundshëm Marcelo-Alex Sandro.
