Aktori i madh Luftar Paja, ka shokuar mbarë opinionin publik dhe vetë kolegët e tij, kur në mbledhje për ndërtimin e teatrit të ri, doli haptazi kundër kolegëve për t’iu vënë në mbrojtje Veliajt. Ai tha prerazi se është pro ndërtimit të teatrit të ri. Po kështu Paja sulmoi edhe aktorin e madh Robert Ndrenika, kur deklaroi se nuk i takon artistit të merret me metrot e llaçin e teatrit.
“Jam për teatër të ri kombëtar, me të gjitha përmasat që i takon një teatri nacional shqiptar. Po që të kemi këtë teatër, nuk më vjen mirë që ne si artistë harrojmë gjënë kryesore dhe merremi me llaçin e tullat.
Këto janë të ndara. Ka kush përgjigjet për llaçin dhe tullat, ka kush përgjigjet për beton e të tjera. Ne si artistë duhet të shtojmë forcat për betonin artistik dhe llaçin artistik. Se ja e bëmë betonin, por a kemi një Romeo dhe Zhulietë që demonstrojë në atë teatër?
Kur them për këtë, nuk e kam fjalën t’i kryejë teatri këto detyra. Kjo është e thellë, duhet parë me përparësi që nga Universiteti i Arteve, kush jep mësim atje dhe çfarë bëjnë, për të ardhur më pas këtu tek llaçi e tulla.
Më vjen keq që lokalizohet jo Tirana, jo Korça, Teatri kombëtar e ka emrin Teatri Kombëtar dhe në këtë teatër nuk duhet të vijnë ata që banojnë në Tiranë.
Kjo të mos lokalizohet. Teatri është edhe i fierakëve, korçarëve, i gjithë Shqipërisë, prandaj mendimi im është që secili të shohë punën e tij dhe të mos merret me ato, merret jo kaq po aq. Aty ka specialistë që merren me atë punë”, tha ai.
