Paralajmërimi i Ambasadës Amerikane në Tiranë per shtetasin e saj që të kenë kujdes, në mënyrë që të mos bëhen pre e sulmeve të mundshme nga Irani në Shqipëri, është bërë objekt debati në parlament.
Opozita mendon se qeveria nuk po merr seriozisht këto deklarata, që paralajmërojnë rrezik per sigurinë kombëtare.
Demokratët kërkojnë thirrjen e mbledhjes së Këshillit të Sigurisë nga kreu i shtetit, si dhe paraqitjen e kryeministrit përpara parlamentit, për të dhënë shpjegime mbi seriozitetin e sulmeve, që paralajmërohen nga selia diplomatike amerikane.
Por, ministrant, si dhe kreu i grupit parlamentar socialist, në unison deklarojnë se thirrja e ambasadës për kujdes të shtuar është një standard, që përfaqësitë diplomatike ndjekin në çdo vend në mënyrë të përditshme, që prej nisjes së konfliktit në Lindjen e Mesme.
Ministri i Brendshëm njoftoi se ka pasur një komunikim direkt me Ambasadën Amerikane nga struktura antiterror dhe nuk rezulton asnjë informacion konkret për sulme të mundshme.
Tensionet në Lindjen e Mesme u pasuan nga ato të brendshmet, ku kësaj radhe, shkak i debatit mes palëve u bë kërkesa e socialistëve për të mbajtur 1 minutë heshtje, lidhur me masakrën e 2 prillit.
“Deputetët e Shkodrës kanë kërkuar që grupi ynë të propozojë në këtë 35-vjetor mbajtjen e 1 minutë heshtjeje në përkujtim të dëshmorëve të demokracisë, PS i respekton të gjithë dëshmorët”, tha Balla.
Kjo kërkesë u cilësua provokim nga demokratët të cilët bllokuan foltoren, çka e detyroi Kryetarin e Kuvendit të ndërpresë seancën.
Por përplasjet nuk munguan as në pushim, ku protagonistë ishin Flamur Noka e Taulant Balla.
“Do të të rrjep si kec. Je ai që kërcënon dhe shantazhon deputete të opozitës. Të rrjep si kec. Të bëj atë që nuk të shkon në mendje”, ishin fjalët e Nokës.
