Gjatë interpelancës së sotme me ministren e Shëndetësisë, deputeti Agron Shehaj i ka kërkuar ministres Albana Koçiu të japë përgjigje për mungesën e ilaçeve në spitale duke treguar raste konkrete nga qytetarët që shëndetësia nuk është falas.
Shehaj e nisi fjalën e tij në parlament me një video dëshmi për rastin e një qytetari të cilit i vdiq djali për mungesë ilaçesh në onkologjik: “Humbi jetën çuni vetëm për sebep të ilaçeve”.
Në fjalën e tij, Shehaj gjithashtu ka sjellë në vëmendje përgjigjen e ministres që i thotë “Pse s’ke ardhur të trokasësh në derën time të sjellësh të sëmurët kur je kaq i shqetësuar”?
“Kush jeni ju që të vij të rrokas unë te dera juaj? Kush mendoni se jeni ju? Ju jeni një shërbëtore, ju duhet ti shërbeni qytetarëve. Çfarë do bënit ju po të trokisja unë? Do ia hiqnit atij e do ia jepnit dikujt tjetër? Ju vendosni kush do jetojë e kush do vdesë në këtë vend? Si guxoni e thoni një gjë të tillë? Pse s’erdhe të trokasësh thotë. Si mund ta thuash një gjë të tillë?”, tha Shehaj.
Ministrja Koçiu nga ana tjetër tha se tregtimi në farmacitë e rrjetit të hapur të barnave për përdorim spitalor përbën shkelje të rëndë të legjislacionit dhe se këto rast janë objekt inspektimi nga Agjencia Kombëtare e Barnave. Në përfundim të interpelancës, deputeti Shehaj tha se përgjegjësia e mungesës së ilaçeve nuk është e mjekëve por e ministrisë.
“Ju i vini fajin mjekëve. Mjekët thoni. Kemi marrë masat për mjekët. Pse në rastin konkret mjekja e ka fajin? Mjekja i tha nuk ka ilaçe ka mbaruar. Çfarë duhet të bëjë një mjeke? Nuk e ka fajin mjekja znj. Ministre, fajin e keni ju, ilaçet mungojnë sepse i morët ju, si mori mjekja. Ilaçet mungojnë se nuk e thotë vetëm ajo, e thonë të gjithë. E thonë komunikimet, ke chat-in. Mjekët janë viktima po aq sa janë edhe pacientët, sa janë të gjithë shqiptarët këtu të cilët i keni hipur në kurriz dhe po pasuroheni. Krijoni kushtet. Me mjekët le të merret prokuroria. Mos u merrni me mjekët znj ministre.”, tha Shehaj.
