Manchester City ka pësuar një humbje shokuese përballë Crystal Palace 4 pikë larg vendit të parë që mbahet nga Liverpool. “Qytetarët” e kanë nisur sfidën si gjithmonë duke dominuar, dhe kanë gjetur rrugën e golit në minutën e 27’ me Gundogan.
Por vetëm gjashtë minuta më pas, nëpërmjet një aksioni pa shumë pretendime miqtë shënojnë golin e avantazhit me anë të Schlupp. Ajo ishte goditja e parë në portën e City-t. Dy minuta më pas, në minutën e 35’, ishte Toënsend ai që përmbys gjithçka me një gol që do të jetë kandidat për golin e sezonit.
Pas pushimit Qytetarët marrin një tjetër shuplakë teksa Milivojevic shënon golin e tretë për miqtw nga pika e bardhë e penalltisë. Guardiola reagon menjëherë duke futur në fushë Aguero, Mahrez dhe De Bruyne, por City e ka shumë të vështirë të depërtojë në prapavijën hermetike të ndërtuar nga ujku i vjetër Roy Hodgson.
De Bruyne i jep një fije shpresë City-t me golin e tij në minutën e 85’. Belgu ishte me shumë fat teksa krosi i tij përfundoi në rrjetë. Por në minutat e mbetura rezultati mbetet i pandryshuar dhe Palace i ka bërë një nder të madh Liverpool-it me këtë fitore historike.
Ndërkohë Chelsea gjithashtu ka humbur në shtëpi me rezultatin 1-0 ndaj Leicester City. Ishte një tjetër paraqitje e dobët e djemve të Sarri-t që tani rrezikojnë të mbeten jashtë katër më të mirëve. Ishte Jamie Vardy ai që ndëshkoi Blutë e Londrës në pjesën e parë dhe, megjithëse kishin shumë kohë në dispozicion, ata nuk arritën të shënon të paktën golin e barazimit duke lejuar Leicester të largohet me tre pikë nga Stamford Bridge.
