Teksa ishte i ftuar në emisionin radiofonik “Tutti Convocati”, Gianni de Biasi ka folur për mesjavën e Ligës së Kampioneve, duke filluar nga paraqitja e Juventusit ndaj Barcelonës.
Ndër të tjera, trajneri i kuq e zinjve tha se Messi nuk është më ai i dy viteve më parë, ndërsa shtoi se Juventus është ndërtuar për të bërë spektakël, shkruan Panorama.
“Skuadra e Juventusit është ndërtuar për të fituar dhe për të bërë spektakël, dhe këtë e tregoi edhe kundër Barcelonës. Ka bërë paraqitje të madhe, luajti në mënyrë inteligjente, e gatshme të shfrytëzonte dobësitë e katalanasve. Mbrojtja është unaza më e dobët e tyre, edhe për faktin se përpara nuk ndrit fenomeni Messi, nuk është më ai i një apo dy viteve më parë dhe kjo ndjehet te rendimenti i skuadrës.”
Dybala-në ai e quajti një talent të jashtëzakonshëm, ndërsa kritikoi ashpër mënyrën se si UEFA administroi ndeshjen e Borusia Dortmund ndaj Monako.
“Dybala? Është një lojtar që ka një talent të jashtëzakonshëm dhe është në formë të shkëlqyer, ka përpara të ardhmen. Është një i ri i administruar mirë, është ndërthurur në ekip gradualisht, strategjia e Alegrit ishte fituese dhe i ka bërë mirë…
Lojtarët e Dortmundit nuk ishin në gjendje të luanin. Kam parë gabime të tmerrshme nga lojtarë të mirë. Nuk kishin qetësinë për të luajtur pak orë pas atij episodi që të ndikon për jetën, mendon se mund të mos kthehesh më në shtëpi. Pavarësisht kësaj, u desh të luanin me pasojat që u panë në fushë edhe pse nuk mund të tregonin diçka aty. Janë skllevër të kohës dhe kalendarëve. UEFA mund të zhvendoste disa ditë ndeshjen por kjo është ndeshje false. Sidomos për Borussi-an që është në një nivel tjetër por që një natë më parë ishte një fantazmë.”
