Për presidentin e Këshillit Evropian, Antonio Costa, Shqipëria është mishërimi i procesit të zgjerimit të BE-së, duke e cilësuar si në rrugën e duhur të anëtarësimit.
I mbërritur në Tiranë për Samitin e Komunitetit Politik të liderëve të Europës, Costa në konferencën e përbashkët me kryeministrin Edi Rama dha sinjale pozitive për procesin e integrimit të Shqipërisë në BE.
“Rezultati i zgjedhjeve këtë javë konfirmoi edhe një herë dëshirën e qytetarëve shqiptarë për t’u integruar në BE dhe i dashur, Edi, më lejoni t’ju përgëzoj edhe një herë për këtë fitore mbresëlënëse! Anëtarësimi i Shqipërisë në BE është objektivi ynë i përbashkët dhe këtu nuk bëhet fjalë për ‘në qoftë se’ apo ‘se si’, po këtu bëhet fjalë për ‘kur’. Tashmë dy çështje janë kyçe: ruajtja e ritmit dhe intensifikimi i punës, në veçanti sundimi i ligjit dhe lufta kundër korrupsionit”, tha Antonio Costa, President i Këshillit të Evropës.
Costa nuk e përjashtoi mundësinë që Shqipëria të jetë anëtare e BE-së përpara vitit 2030, por kjo, sipas tij, varet nga plotësimi i kushteve.
“Nuk është se po kërkoj ndonjë datë magjike në vetvete, por ne do të shikojmë dita-ditës se çfarë po arrin Shqipëria. Sapo të kemi përfunduar procesin, ne do ta bëjmë anëtare të BE-së, pse jo edhe përpara vitit 2030”, tha Costa.
Kryeministri Edi Rama, nga ana e tij, u shpreh i vendosur për mbylljen e negociatave sipas planit të dakordësuar me Brukselin, duke synuar t’i hapë të gjithë kapitujt brenda vitit dhe mbylljen e tyre në vitin 2027.
“Ne na është dhënë mundësia historike pasi janë rreshtuar yjet bashkë dhe Bashkimi Europian ka hapur derën. Kështu që ne do bëjmë tonën. Pasi ne të bëjmë tonën, pastaj topi është në fushën e tyre për të hapur derën”, tha Rama.
Nuk munguan as batutat në lidhje me mosbesimin për procesin e anëtarësimit.
“Besoni tek ne. E mbaj mend shumë mirë përpara disa vitesh kur kemi ardhur këtu në Tiranë dhe kemi dëgjuar Edi Ramën kur tha: ‘Dëgjoni, askush nuk ju beson më ose që ne do të bëhemi shtet anëtar, sepse aq shumë herë është thënë saqë tashmë askush nuk e beson’. Kështu që, jam i sigurt që edhe Edi Rama beson tani në një gjë që nuk besonte para dy vitesh”, tha Costa.
“Unë personalisht nuk e kam humbur asnjëherë besimin, por gjithmonë kam thënë që kjo është një histori dashurie. Deri kur ana tjetër do ta ndiejë nevojën për ty, ti duhet të mos dorëzohesh”, tha Rama.
Tv Klan
