Superderbi i Argjentinës, Boca Junior-River Plate është ndalur në barazim 2-2. Kjo ishte finalja e parë e Kupës Libertadore dhe lë gjithçka të hapur për ndeshjen e kthimit në “Monumental” që do të zhvillohet më 24 nëntor. Loja u zhvilluar përpara syve të një publiku të çmendur pas ekipit të tyre dhe kjo padyshim që i shtoi emocionin finales.
Mbase edhe për shkak të presionit të madh të të luajturit përpara një stadiumi të mbushur plot e përplot, Boca nuk e nis mirë ndeshjen teksa River arrin të krijojë dy mundësi shumë të mira në 15 minutat e para të ndeshjes, por nuk arrin t’i shfrytëzojë si duhet pasi duhet të kishte bërë të paktën një gol me rastet e Pratto dhe Borre.
Dhe në minutën e 34’ Boca, me rastin e parë në zonën kundërshtare, arrin të shënojë golin e avantazhit me anë të Abila-s. Por avantazhi i vendasve zgjati vetëm një minutë pasi menjëherë në aksionin pasardhës miqtë barazojnë rezultatin me Pratto-n.
Pas golit River ka dy mundësi të tjera për të marrë avantazhin, por i shpërdoron dhe ndëshkohet në minutat shtesë të pjesës së parë me golin e Cano-s me kokë.
Pas pushimit River nuk humb shpresat dhe gjen golin e barazimit për të dytën herë në minutën 61’ me autogolin e Izquierdoz. Pas golit të barazimit, Boca luan më mirë dhe kontrollon lojën në gjysmëfushën kundërshtare. Gjithsesi mundësitë për të shënuar mungojnë përveç rastit të minutave të fundit që duhet të ishte bërë gol nga vendasit. Një barazim që lë gjithçka të hapur për raundin e dytë.
