Guardia di Finanza në bashkëpunim me Prokurorinë dhe Karabinierët italianë ka shkatërruar një rrjet të trafikut ndërkombëtar të drogës, me përbërje italo-shqiptare, që vepronte në zonat e Arezzos, Perugias dhe Sienës.
Operacioni, i koduar “Pastrimi”, u konkretizua me arrestimin e 12 personave, shumica shqiptarë. Tetë prej tyre janë vendosur në paraburgim, dy janë në arrest shtëpie, ndërsa dy të tjerë janë detyruar të paraqiten çdo ditë në policinë gjyqësore.
Hetimet kishin nisur në tetor të vitit 2023 dhe janë shoqëruar me një sërë përgjimesh dhe filmimesh që ndihmuan në zbulimin e aktivitetit kriminal. Organizata ishte e specializuar në trafikun dhe shpërndarjen e lëndëve narkotike si kokainë, hashash dhe marihuanë në territore të gjera, përfshirë Arezzo, Valdarno, Città di Castello dhe Montepulciano.
