6 Tetor 1838- Samuel Morse prezanton telegrafin
Sistemi i telegrafit, prezantohet për herë të parë në publik nga Samuel Morse në Nju Xhersi të SHBA-së. Telegrafi, një pajisje që përdorte impulset elektrike për të transmetuar mesazhe të koduara nëpërmjet një teli, do të revoluciononte përfundimisht komunikimin në distanca të gjata, duke arritur kulmin e popullaritetit të tij gjatë viteve 1920-1930.
Samuel Finley Breese Morse lindi në Charlestown, Massachusetts. Ai ndoqi Universitetin e Jeilit, ku shfaqi interes për artin, por edhe për energjinë elektrike, asokohe ende në fillimet e veta. Pas universitetit, Morse u bë piktor. Në vitin 1832, teksa kthehej në SHBA nga Evropa, ai dëgjoi për elektromagnetin e sapo zbuluar, dhe në atë moment i lindi ideja e një telegrafi elektrik.
Morse nuk e dinte se edhe shpikës të tjerë, i ishin futur punës për ta realizuar diçka të tillë. Ai i kaloi vitet e ardhshme duke zhvilluar një prototip, dhe u ndihmua në këtë sipërmarrje nga dy miqtë tij, Leonard Gale dhe Alfred Vail. Në 1838, e prezanton shpikjen e tij duke përdorur kodin që mbante emrin e tij, në të cilin pikat apo vizat përfaqësonin gërma dhe numra.
Megjithatë vetëm më 1843, Morse arriti të bindë një Kongres Amerikan tejet skeptic, për të financuar ndërtimin e linjës së parë telegrafike në Shtetet e Bashkuara, nga Uashingtoni në Baltimorë. Në majin e vitit 1844, Morse dërgoi telegramin e parë zyrtar. Gjatë disa viteve që pasuan, kompanitë private, duke përdorur patentën e Morse, ndëruan linja telegrafike kryesisht në verilindje të SHBA-së.
Në vitin 1851, në Nju Jork dhe Misisipi u themelua “Printing Telegraph Company“, që më vonë do të ndryshonte emrin e saj në Western Union. Në vitin 1861, kjo e fundit përfundoi linjën e parë transkontinentale në mbarë Shtetet e Bashkuara. Pesë vjet më vonë, u ndërtua linja e parë e suksesshme e përhershme përgjatë Oqeanit Atlantik, dhe deri në fundin e shekullit XIX, sistemet telegrafike u vendosën në Afrikë, Azi dhe Australi.
6 Tetor 1973- Në Lindjen e Mesme, fillon Lufta e Yom Kippur-it
Duke shpresuar të rifitonin territoret e humbura ndaj Izraelit gjatë luftës së tretë arabo-izraelite, forcat egjiptiane dhe siriane nisin një sulm të koordinuar kundër Izraelit në Yom Kippur, dita më e shenjtë në kalendarin hebraik. Duke i kapur në befasi trupat izraelite, forcat egjiptiane depërtuan thellë në Gadishullin e Sinait, ndërsa Siria u përpoq t’i dëbonte izraelitet nga luginat e Golanit.
Luftës iu bashkuan edhe forcat irakiane, ndërsa Siria mori mbështetje nga Jordania. Por pas disa ditësh, Izraeli u mobilizua plotësisht dhe ushtria filloi të zprapsë ushtritë arabe. Në fundin e tetorit 1973, u arrit një armëpushim egjiptiano-izraelit, me ndërmjetësimin e Kombeve të Bashkuara.
Në vitin 1974, u nënshkrua marrëveshja për rikthimin e Sinait shtetit të Egjiptit, dhe në vitin 1979 kryeministrat Sadat dhe Begin, nënshkruan marrëveshjen e parë të paqes midis Izraelit dhe Egjiptit. Për Sirinë, Lufta e Yom Kippur-it, rezultoi një katastrofë. Damasku pësoi humbje të rënda, dhe Izraeli pushtoi edhe më shumë territore në lartësitë e Golanit.
6 Tetor 1981 – Vritet në një atentat presidenti egjiptian Anvar Sadat
Ekstremistët islamikë vrasin presidentin e Egjiptit, Anvar Sadat, gjatë një parade ushtarake me rastin e përvjetorit të Luftës së Yom Kippur-it. Sulm u udhëhoq nga Khaled El-Islambuli, një toger i ushtrisë egjiptiane, i lidhur me grupin terrorist “Takfir Wal-Hajira”.
Terroristët, të gjithë të veshur me uniforma ushtarake, u ndalën para podiumit duke qëlluar me armë dhe hedhur granata në drejtim kryeministrit dhe zyrtarëve të tjerë. Sadat u qëllua 4 herë, dhe vdiq dy orë më vonë në spital, ndërsa në atë atentat gjetën vdekjen edhe 10 persona të tjerë.
6 Tetor 1989 – Ndahet nga jeta aktorja e njohur amerikane Bette Davis
Bette Davis nënshkroi kontratën e parë me kompaninë “Warner Bros” në vitin 1932, dhe luajti në disa filma që u vlerësuan nga kritika. Deri në fund të viteve 1940, ajo qe një nga aktoret kryesore më të mira të kinemasë amerikane. Davis ishte presidentja e parë femër e Akademisë së Arteve, Filmit dhe Shkencave në SHBA. Ajo fitoi 2 herë çmimin Oskar, dhe u kandidua 10 herë të tjera për këtë çmim. Me më shumë se 100 filma kinematografikë, televizivë dhe role në teatër, Bette Davis u rendit në vitin 1999 e dyta, pas Katharine Hepburn, në listën e Institutit Amerikan të Filmit, si aktorja më e mirë e të gjitha kohërave.
6 Tetor 1908 – Austria-Hungaria anekson Bosnje-Hercegovinën
Austro-Hungaria shpall aneksimin e Bosnjes dhe Hercegovinës. Edhe pse ligjërisht Bosnja ishte deri atëherë nën kontrollin e Perandorisë Osmane, Austro-Hungaria kishte administruar de fakto të dyja provincat që nga Kongresi i Berlinit në vitin 1878, me vendimin e përbashkët të fuqive të mëdha të Evropës.
6 Tetor 1949 – Bashkimi Sovjetik, krijon Republikën Demokratike të Gjermanisë (Gjermania Lindore), brenda zonës së pushtimit sovjetik.
6 Tetor 1968 – Ministri i Mbrojtjes i Çekosllovakisë, njoftoi pas takimit me homologun e tij sovjetik, se shumica e trupave sovjetike në vend do të fillonin të tërhiqeshin nga fundi i tetorit.
6 Tetor 1014 – Perandori bizantin Bazili, fitoi nofkën “Verbuesi i bullgarëve”, pasi urdhëroi verbimin e mbi 15.000 ushtarëve bullgarë të kapur robër.
6 Tetor 1539 – Konkuistadori spanjoll, Hernando de Soto, dhe ushtria e tij hyjnë me forcë në kryeqytetin Apalashe të Anhaikas (në Floridan e sotme).
6 Tetor 1801 – Napoleon Bonaparti, imponon miratimin e një kushtetute të re në Holandë.
6 Tetor 1941 – Trupat gjermane, rinisin një ofensivë të re për pushtimin e kryeqytetit sovjetik, Moskë.
