1192 – Mbreti i Jeruzalemit, Conradi i Parë vritet në Tyre (Liban), vetëm dy ditë pasi ishte zgjedhur në këtë post. Vrasja u krye nga hashashinët, sekt i formuar në fund të shekullit të 11-të.
1686 – Isak Njutoni boton vëllimin e parë të librit të tij “Principia”, ku ai shpjegon ligjet e lëvizjes. Asnjë vepër shkencore nuk ka tërhequr më shumë vëmendjen e filozofëve sesa Principia.
1908 – Lindi biznesmeni austriak, Oskar Schindler, në Moravi; subjekt i romanit “Arka e Shindlerit” (1974) dhe më pas i filmit “Lista e Shindlerit”.
Pas Luftës së Dytë Botërore, Schindler dhe gruaja e tij, Emilie, u vendosën në Regensburg, Gjermani deri në vitin 1949, kur emigruan në Argjentinë. Në vitin 1962, Yad Vashem i dha Schindlerit titullin “Të ndershmit mes Kombeve”, në njohje të përpjekjeve të tij për të shpëtuar hebrenjtë gjatë Holokaustit nazist. Emilie u nderua në mënyrë të ngjashme në vitin 1993. Schindler vdiq në Gjermani më 1974 – kishte mbetur i varfër dhe i vetmuar. Disa nga hebrenjtë që Shindleri kishte ndihmuar të mbijetonin, mblodhën ndihma financiare për transferimin e trupit të tij për t’u varrosur në Izrael.
Historia e Shindlerit tërhoqi shumë vëmendje në sajë të filmit Lista e Shindlerit, me regji të Stiven Spielbergut (1993), bazuar në një roman të vitit 1983, nga Thomas Keneally.
1912 – Themelohet zyrtarisht Vatra. Takimi i parë që mblodhi të gjitha organizatat shqiptaro-amerikane në një federatë, u zhvilluar më 24 dhjetor 1911, në Boston, me nismën e shoqatës “Besa – Besë”.
Në këto takime ishin të pranishëm: Faik Konica, Fan Noli, Kristo Floqi, Marko Adams, dhe Paskal Aleksi.
1916 – Lindi Bill Bland, në Ashton, Angli, që ishte marksist-leninist britanik. Para se të bëhej udhëheqës i lëvizjes antirevizioniste, Bland ishte anëtar i Partisë Komuniste të Zelandës së Re dhe Partisë Komuniste të Britanisë. Mao Ce Dunin e konsideronte-deviacionist, ndërsa komunizmin e Enver Hoxhës e quante të vërtetë në traditën e Marksit, Leninit dhe Stalinit. Bland e vizitoi Shqipërinë për herë të parë në vitin 1962 me ftesë të PPSH-së. Nga viti 1968 – 1978, lidhjet e tij me Shqipërinë u ndërprenë për shkak të qëndrimit pro kinez të Enver Hoxhës, por marrëdhëniet e ngushta u rivendosën pas prishjes së aleancës kino–shqiptare. Bland ishte një nga themeluesit e shoqatës shqiptare-britanike dhe, më pas, sekretar i saj për gati 30 vjet deri në rënien e regjimit komunist në Shqipëri. Bland vdiq më 13 mars 2001.
1939 – Hitleri mban një fjalim në parlament, ku njeh dhe miraton pushtimin e Shqipërisë nga Italia, duke përgëzuar Musolinin për sigurimin e “hapësirës jetike” për fashizmin, ashtu si Gjermania po përpiqej për nacional-socializmin.
1945 – Ekzekutohet Benito Mussolini nga partizanët italianë.
