Çfarë ka ndodhur më 18 shtator?

18 Shtator 1961- Shefi i OKB-së Hammarskjold vdes në një aksident ajror

Sekretari i Përgjithshëm i Kombeve të Bashkuara, suedezi Dag Hammarskjold humbi jetën, ku avioni i tij u rrëzua në rrethana misterioze pranë Ndolas në Rodezinë Veriore në Afrikë (Zambia e sotme). Hammarskjold po shkonte të takonte Moise Tshombe, liderin e krahinës separatiste kongoleze të Katangas, për të biseduar mbi dhënien fund të krizës që kishte përfshirë Kongon.

Hammarskjold, sekretari i dytë i përgjithshëm i Kombeve të Bashkuara, ishte një person me ndikim të madh për paqen gjatë 7 viteve të tij në atë detyrë. Ai qe djali i Hjalmar Hammarskjold, ish-kryeministrit të Suedisë gjatë viteve 1914-1917. Dag Hammarskjold punoi si ekonomist, dhe në vitet 1930 iu bashkua shërbimit civil suedez, si sekretar i një komiteti qeveritar mbi papunësinë.

Në vitin 1936, ai mbante postin e nënsekretarit të përhershëm në Ministrinë e Financave. Hammarskjold u bë pjesë e ministrisë së Jashtme të Suedisë në vitin 1947, dhe në vitin 1951 merr postin e zv.ministrit. Po atë vit, udhëtoi për në Kombet e Bashkuara si nënkryetar i delegacionit suedez, dhe një vit më pasi si kryetar, ndërsa në vitin 1954 zgjidhet shefi i ri i OKB-së.

18 Shtator 1987 – Reagan njofton eleminimin e nga 1 mijë mbushjeve bërthamore nga SHBA dhe BRSS

Shtetet e Bashkuara dhe Bashkimi Sovketik, do të nënshkruanin në fund të vitit 1987 një marrëveshje për të zvogëluar numrin e raketave bërthamore. Presidenti amerikan, Ronald Reagan, njoftoi në 18 shtator 1987 se mbi 1.000 mbushje bërthamore do të eleminoheshin gjatë viteve të ardhshme nga secila prej dy supërfuqive.

Samiti SHBA-BRSS  në Uashington, do të përfundonte me traktatin e parë që reduktonte numrin e përgjithshëm të armëve bërthamore, që nga shpikja e tyre 50 vjet më parë. Presidenti Reagan, tha se bisedimet ishin “të sinqerta dhe konstruktive”, në një kohë që ministri i Jashtëm sovjetik, Eduard Shevardnadze, tha se ishte “koha për të vjelur frytet”.

18 Shtator 1851- Themelohet gazeta prestigjioze “New York Times”

E përditshmja e mirënjohur amerikane “New York Times” u themelua më 18 shtator 1851, nga gazetari dhe politikani Henry Jarvis Raymond, zv/kryetari i Komitetit Kombëtar Republikan dhe ish-bankieri George Jones, fillimisht si “New York Daily Times”. Ajo u shit në fillim 1 cent për kopje. Gazeta e ndryshoi emrin e saj në “The New York Times” në vitin 1857.

Ndikimi i gazetës u rrit gjatë viteve 1870-71, ndërsa ruajti linjën politike të Partisë Republikane. Ndërkohë, gjatë viteve 1880, “New York Times”, vetëshpallet politikisht e pavarur; edhe pse në vitin 1884, gazeta mbështeti kandidatin demokrat Grover Cleveland në zgjedhjet e tij të para presidenciale. Ndërsa ky veprim, e dëmtoi lexueshmërinë e të përditshmes, gazeta e rifitoi brenda pak vitesh pjesën më të madhe të terrenit të humbur.

“New York Times” u ble nga Adolph Ochs, botues i “Chattanooga Times” në vitin 1896. Një vit më pas ai shpalli sloganin e gazetës:”Të gjitha lajmet që janë të përshtatshme për t’u publikuar”; kjo përbente një goditje ndaj botimeve konkurrente si “Neë York World” e Joseph Pulitzer, dhe “New York Journal” e William Randolph Hearst, të cilat ishin të njohura për gazetarinë investigative.

Nën drejtimin e tij, “The New York Times” arriti famën ndërkombëtare kur në vitin 1904 mori transmetimin e parë pa tel nga një betejë detare, një raport mbi shkatërrimin e flotës ruse në betejën e Port Arturit në Detin e Verdhë, gjatë Luftës Ruso-Japoneze. Në 1910, gazeta u kërkua të shpërndahej çdo ditë në Filadelfia, ndërsa 10 vjet më vonë, filloi të dërgohej çdo ditë me avion në Londër.

18 Shtator 1970 – Vdes këngëtari i famshëm Jimi Hendrix

Këngëtari i njohur i muzikës heavy-metal, Jimi Hendrix, vdes në Londër në rrethana të cilat nuk u shpjeguan asnjëherë plotësisht. Ai e kishte kaluar mbrëmjen e fundit në një festë, dhe u dërgua për të fjetur nga e dashura Monika Dannemann në banesën e saj në Hotel Samarkand në Notting Hill. Nga të dhënat e autopsisë dhe deklaratat e miqve të tij, rezulton që Hendrix të ketë vdekur brenda disa orëve pas mesnatës.

18 Shtator 1987 – Qindra vetë helmohen qëllimisht në Brazil

Qindra njerëz u helmuan nga rrezatimi i çeziumit 137, nga një aparaturë e braktisur në rrugë

që dikur ishte përdorur për terapinë kundër sëmundjeve tumorale. Instituti i Radioterapisë në Goiania, 950 km larg Sao Paolos kishte ndërruar ambjent, dhe kishte marrë më këtë rast edhe një pajisje të re, ndërsa pajisjen e vjetër e braktisi në rënojat e ndërtesën e vjetër të institutit, deri kur dy banditë e nxorrën qëllimisht në rrugë, duke helmuar qindra kalimtarë.

18 Shtator 1934- Bashkimi Sovjetik pranohet në Lidhjen e Kombeve, Ai u dëbua vetëm disa vjet më vonë, për shkak të veprimeve të tij saj agresive ndaj Finlandës.

18 Shtator 1948 – Margaret Chase Smith, bëhet gruaja e parë e zgjedhur në Senat, kur arriti të mposhtë kundërshtarin demokrat Adrian Scolten. Smith është gjithashtu gruaja e vetme, që u zgjodh të shërbejë si në Senat ashtu edhe në Kongres.