17 Tetor 1973 – Shtetet e OPEC shpallin embargon e naftës
Organizata e Vendeve Eksportuese të Naftës (OPEC), vë në zbatim atë që e quan “diplomacia e naftës”:Çdo komb që kishte mbështetur Izraelin në “Luftën e Yom Kippur-it” kundër Egjiptit, Sirisë dhe Jordanisë, ndalohej të blinte naftë nga vendet e kësaj organizate. Kriza energjitike që shkaktoi kjo embargoi, shënoi fundin e epokës së naftës së lirë, ndësa vetëm Bursa e Nju Jorkut pësoi 97 miliardë dollarë humbje.
Nga ana tjetër, embargoja shkaktoi fillimin e një prej recesioneve më të rënda ekonomike, që kishin përjetuar ndonjëherë Shtetet e Bashkuara. Në mesin e vitit të vitit 1973, edhe para embargos së OPEC-ut, një krizë amerikane e naftës ishte në horizont:Rezervat e brendshme qenë të ulëta (rreth 52 miliardë fuçi, një furnizim 10-vjeçar); SHBA-të po importonin rreth 27 përqind të naftës bruto që i nevojitej çdo vit; dhe çmimet e naftës po rriteshin.
Lufta e vitit 1973 me Izraelin i përkeqësoi gjerat. Tradicionalisht, çmimet për një fuçi nafte vendoseshin nga vetë kompanitë e naftës, por në dhjetor, OPEC njoftoi rritjen e çmimit deri në 11.65 dollarë, ose 130 për qind më e lartë se ajo që ishte në tetor, dhe 387 përqind më e lartë se çmimi i një viti më parë. Njerëzit në SHBA, filluan të prisnin me orë të tëra në rradhë para pikave të furnizimit me karburant. Shitjet e makinave më të vogla dhe më ekonomike shënuan rekord.
17 Tetor 1961 – Policia franceze vret qindra protestues algjerianë në Paris
Policia e Parisit masakron më shumë se 200 algjerianë, që po marshonin në qytet në mbështetje të bisedimeve të paqes, për t’i dhënë fund luftës për pavarësinë e vendit të tyre kundër Francës.
Asokohe tensionet në kryeqytetin francez qenë në kulmin e tyre, për shkak të terroristëve algjerianë që shpërthenin vazhdimisht bomba që shënjestronin kryesisht forcat e sigurisë.
Në kundërpërgjigje, shefi i policisë së Parisit, Maurice Papon, urdhëroi një goditje ndaj komunitetit algjerian të Parisit, duke u shpjeguar oficerëve të tij se do të mbroheshin nga çdo akuzë për dhunë të tepruar.
Policia kontrolloi getot algjeriane për zbulimin e terroristëve, duke vrarë një numër algjerianësh të pafajshëm para se t’i kthenin armët e tyre mbi një grup prej 30.000 protestuesish që sfiduan gjendjen e shtetrrethimit, dhe u mblodhën pranë lumit të Senës mbrëmjen e 17 tetorit. Të nesërmen policia publikoi një deklaratë zyrtare, ku flitej për 3 persona të vdekur dhe 67 të plagosur, një shifër që përgjithësisht u hodh poshtë nga dëshmitarët okularë, që panë sesi dhjetëra trupa të pajetë pluskonin mbi Senë.
Në vitin 1981, u zbulua se Maurice Papon kishte bashkëpunuar me nazistët gjatë pushtimit gjerman të Francës, dhe kishte qenë i detyruar të jepte dorëheqjen nga posti i tij 3-vjeçar si ministër i Buxhetit në kabinetin qeveritar kolaboracionist të Vishisë. Papon, dyshohej gjithashtu se kishte ndihmuar në deportimin e qindra hebrenjve francezë në kampet naziste të vdekjes.
Pas shmangies së gjykimit për 17 vjet me rradhë, Papon u shpal fajtor për “pjesëmarrje në krimet kundër njerëzimit” në vitin 1998, dhe u dënua me 10 vjet burg. Gjatë gjykimit të tij, u shfaqën dokumente rreth masakrës së vitit 1961 në Paris, që pranonin se policët e Papon kishin vrarë shumë më tepër algjerianë se sa ishte pranuar më herët zyrtarisht.
17 Tetor 1797- Nënshkruhet Traktati i Campo Formio-s
Traktati i Campo Formio ose Paqja e Campo Formio-s u nënshkrua më 17 tetor 1797 nga Napoleon Bonapart dhe Konti Ludvig von Kobenzl, si përfaqësues të Francës dhe Austrisë.
Ai shënoi rënien e Koalicionit të Parë, përfundimin me fitore të fushatave të Napoleonit në Itali, dhe fundin e fazës së parë të Luftërave Napoleonike.
Përtej klauzolave të zakonshme të “paqes së fortë dhe të pacanueshme”, traktati kaloi një numër territoresh austriake në duart e francezëve. Vendet e lëshuara përfshinin Holandën Austriake (Belgjika e sotme) dhe ishujt të caktuar në Mesdhe, duke përfshirë Korfuzin dhe ishujt e tjerë në Adriatik.
Venecia dhe territoret e saj u ndanë midis dy shteteve:Venecia, Istria dhe Dalmacia iu dorëzuan perandorit austriak. Austria e njohu Republikën Cisalpine dhe Republikën e Ligurisë të sapokrijuara dhe të formuara nga territoret gjenoveze, si fuqi të pavarura.
17 Tetor 1989- Një tërmet i fortë godet San Franciskon në SHBA
Tërmeti më vdekjeprurës që goditi San Franciskon që nga katastrofa e vitit 1906, ndodhi në orën 5:04 të mëngjesit dhe zgjati vetëm 15 sekonda, me magnitudë 7.1 të shkallës Rihter. Lëkundja e fortë shkaktoi vdekjen e 63 personave, dhe plagosjen e më shumë se 3.000 të tjerëve, në një kohë që u dëmtuan më shumë se 100.000 ndërtesa.
17 Tetor 1814 – Përmbytja e birrës në Londër
Përmbytja e birrës në Londër ndodhi më 17 tetor 1814 në famullinë Shën Xhill. Një depozitë që përmbante 610 mijë litra birrë shpërtheu papritmas, duke shkaktuar shpërthimin e një depozite tjetër aty pranë. Për pasojë, 1 milionë e 470 mijë litra birrë vërshuan rrugëve. Vala e birrës shkatërroi tërësisht dy shtëpi aty pranë, duke vrarë 8 njerëz, ndërsa një person vdiq të nesërmen si pasojë e helmimit nga alkooli.
17 Tetor 1244 – Kryqëzata e Gjashtë përfundon kur një ushtri egjiptiane, thuajse e asgjëson ushtrinë franceze në Gaza.
17 Tetor 1815 – Napoleon Bonaparti mbërrin në ishullin e Shën Helenës në Atlantikun e Jugut, ku ai është dënuar të jetojë në mërgim nga Aleatët.
17 Tetor 1931- Mafiozi i njohur italo-amerikan, Al Capone, shpallet fajtor për evazion fiskal. Një javë më vonë, ai dënohet me 11 vjet burg, dhe 50 mijë dollarë gjobë.
17 Tetor 1994 – Gazetari rus, Dmitry Kholodov, vritet gjatë kohës që po hetonte korrupsionin në rradhët e ushtrisë. Vrasja e tij, i hapi rrugën një seri vrasjesh të gazetarëve në Rusi.
17 Tetor 2001 – Rehavam Ze’evi, ministër i Turizmit në Izrael, dhe themeluesi i partisë së krahut të djathtë Moledet, vritet nga një anëtar i Frontit Popullor për Çlirimin e Palestinës.
17 Tetor 1979 – Nënë Terezës i jepet Çmimi Nobel për Paqen, për ndihmën e saj ndaj të varfërve dhe të braktisurve në Kalkuta të Indisë.
