Pas aktivitetit të 25 vjetorit të Gjykatës kushtetuese, ka folur mbi çështjen Tahiri edhe ministri i Brendshëm Xhafaj.
Ky i fundit, para pak ditësh tha se e vërteta do të dalë dhe çdo hetim i nevojshëm do të kryhet. Por, sot Xhafaj ka dhënë një tjetër deklaratë, teksa ka thënë se sipas tij, Prokuroria nuk ka prova të mjaftueshme për të arrestuar Tahirin dhe se kjo çështje po përdoret politikisht.
“Kur më pyetët për këtë çështje ju thashë që po shqyrtohet nga drejtësia italiane. Gjithë tjerët që flasin sot nuk kanë pasur dhe as nuk kanë asnjë kontribut në këtë çështje, duan të përdorin atë politikisht. Nëse do më pyesni nga pikëpamja ligjore, ajo çfarë është shkruar nga prokuroria e Krimeve të Rënda nuk është një gjë që shpreh vullnetin e ligjit dhe bazueshmërinë në prova. Jemi në rastin kur segmente të prokurorisë po përdoren politikisht.
Precedentë të tillë janë precedentë të rrezikshëm për drejtësinë. Nëse prokuroria disponon prova të tjera, mbetet për t’u parë dhe për t’u gjykuar. Druaj se mos ndodh si në Babicë, ku prokurori u vetpërdor”, tha Xhafaj./ Tirana Today
