Presidenti i Turqisë, Rexhep Tajip Erdogan, dhe Kryeministri Edi Rama, në një ceremoni zyrtare inauguruan xhaminë e Namazgjasë, e cila u ndërtua me financimin e shtetit turk, ndërsa ajo konsiderohet si më e madhja në Ballkan.
Disa mijëra besimtarë ndodhen në xhaminë e Namazgjasë, e cila pavarësisht vonesave në vënien në funksion, konsiderohet si një moment i veccantë për të gjithë besimtarët e komunitetit mysliman në Shqipëri.
Gazment Teqja pritet të jetë imami i kësaj xhamie, ndërsa ajo do të menaxhohet nga një fondacion, ku do të jenë pjesë edhe investitori, pra shteti turk, dhe KMSH.
Kryeministri Edi Rama, gjatë fjalës së tij u shpreh duke thënë se kjo foltore tashmë është trashëgimi e një populli të tërë.
“Fort i nderuar dhe shumë i shtrenjti miku im, presidenti Erdogan. Shumë e nderuar zonja Erdogan. Fort të nderuar klerikë dhe fort të respektuar besimtarë. Ja ku erdhi dita e çeljes së këtij tempulli, ka qenë i shumëpritur nga komuniteti mysliman, i vonuar për shumë arsye.
Kjo faltore që frymon nga një besim universal, është tashmë trashëgimia e një populli të tërë”.- u shpreh Rama.
