Milani ka disa vite që po kalon në një formë mjaft të dobët dhe i ka humbur shkëlqimi që kishte disa vite më parë. Shumë lojtarë të mirë kanë kaluar në radhët e kuqezinjve por që nuk kanë arritur të shkëlqejnë dhe të tregojnë potencialin që kanë. I fundit që u largua mes shumë polemikash është Carlos Bacca, i cili iu bashkua Villarrealit dhe po kalon një formë mjaft të mirë. Sulmuesi kolumbian është shprehur se Milani ka kohë që jeton falë historisë dhe nuk ka gjetur zgjidhje për problemet e tij.
Ai foli për Marca Colombia për karrierën e tij deri tani, duke përfshirë periudhën e tij në San Siro nga 2015 deri 2017. “Milan nuk ishte një hap mbrapa në karrierën time. Nuk ishte Milan-i që njihnim falë historisë së madhe që ka, por nuk jetohet vetëm me histori. Milan ka vite që nuk ka qenë në nivele të mëdha. Shkova aty për shkak të historisë, por u përballa me shumë surpriza.”
Kuqezinjtë së fundmi kanë shkarkuar trajnerin Montella për të sjellë Gattuso-n, por rezultatet nuk është se kanë ndryshuar shumë. “Ata po kërkojnë një zgjidhje, por nuk e kam parë në dy vitet e fundit. Ata menduan se e kishte fajin trajneri dhe e ndryshuan. Më pas problemi ishin lojtarët, dhe tani kanë marrë drejtues të rinj. Loja në La Liga më përshtatet më mirë, pasi kam më shumë hapësirë. Në Itali futbolli është më taktik.”
