Deputeti demokrat Oerd Bylukbashi nuk ka lënë pa ironizuar takimin mes kreut të Qeverisë Edi Rama dhe kryeparlamentarit Ilir Meta, dje në mbrëmje, tek Pazari i Ri. Bylykbashi ka sajuar një barcaletë, ku personazhet kryesore janë Meta dhe Rama duke shitur peshk të prishur tek “Pazari i Ri”. Sipas deputetit demokrat, dy bashkëqeverisësit donin që t’i shisnin peshk të qelbur qytetarit.
Postimi i plotë i deputetit Bylykbashi
Osht qelb ka hone!
Te markata e peshkut ishin dy tipa, njeri i gjatë dhe tjetri i shkurtër që po shisnin peshk me tezgë. Afrohet nje burrë i vjeter dhe i pyet:
– I freskët është ky peshku, mer çuna?
– Pooo, shumë i freskët, sapo është kap – i thonë këta të dy.
– A ta shoh pak? – pyet i moshuari dhe mori një peshk, e pa me kujdes, i mori erë tek bishti dhe rrudhi fytyrën.
Tipi i gjatë nuk e mbajti gjuhën dhe i tha:
– Eh mer xhaje, s’merrke erë fare nga peshku! Si të mbaka plaka te shpia?! Po pse re, te bishti shihet peshku a është i freskët apo jo?! Te koka re, aty qelbet peshku, po ku mer vesh ti! Leje plakën t’boj pazar më mirë.
I moshuari e pa një herë nga poshtë-lart, se helbete ishte zullap i gjatë, i hodhi një sy edhe shokut të tij të shkurtër e ia priti:
– Të keqen xhaja qeke hazër xhevap. Ke të drejtë, peshku qelbet nga koka, po më ka mësu baba se kur mban erë bishti, koka osht qelb ka hone (me kohë). Ky mbaka erë mer xhaje e të qelbka qysh n’bisht.
I gjati ngeli si pemë, kurse i shkurtri qeshi pak, por e mbylli gojën se bashkë po e shisnin peshkun.
