Udhëheqësit e vendeve anëtare të NATO-s do të mblidhen në muajin maj, në Bruksel, në Samitin e radhës. Në Mnisterialin e Aleancës do të marrë pjesë edhe ministri i Jashtëm shqiptar, Ditmir Bushati.
“Bisedime frytdhënëse në ministerialin e NATO-s, në Bruksel, në përgatitje të Samitit të muajit maj. Rikonfirmuam rëndësinë e Aleancës Transatlantike, ramë dakord për një angazhim të përforcuar të Aleancës në luftën kundër terrorizmit, për të vijuar me rritjen e buxheteve të Mbrojtjes, si dhe për një vëmendje të shtuar në Ballkan, ku roli i aktorëve të tretë ndikon në përkeqësimin e situatës së sigurisë”, thotë kryediplomati shqiptar.
Në kuadër të përpjekjeve për një shpërndarje më të drejtë të përgjegjësive brenda aleancës, Shqipëria ka rritur buxhetin e mbrojtjes në vitet 2016-2017, si dhe investimet për modernizimin e Forcave të Armatosura.
“Kontributet tona, konkrete dhe në rritje, e rendisin Shqipërinë krahë aleatëve dhe partnerëve më aktivë në misionet dhe operacionet e NATO-s, duke përfshirë Afganistanin, Kosovën, detin Egje dhe së shpejti Letoninë”, thotë Bushati.
Ministri i Jashtëm shton se vëmendja e shtuar e NATO-s, në rajonin tonë, mbetet thelbësore për t’u bërë ballë sfidave të sigurisë me të cilat po përballet së fundmi Ballkani Perëndimor.
