Presidenti i Komisionit të Bashkimit Evropian Jean-Claude Juncker, në një artikull të shkruar për gazetën gjermane ‘‘Bild am Sonntag’’ thekson se pamjet e sulmit ndaj Parlamentit Turk dhe vrasja e civilëve të pafajshëm gjatë tentativës për grusht shteti kanë lënë gjurmë tek ai.
Juncker ka rikujtuar se ende pa u ditur përfundimi i tentativës për grusht shteti, teksa ndodhej në kryeqytetin e Mongolisë Ulanbatur, së bashku me presidentin e Këshillit Evropian Donald Tusk dhe Përfaqësuesen e Lartë të BE-së për Marrëdhënie të Jashtme dhe Politika të Sigurisë Federica Mogherini, kishin dënuar sulmin e bërë ndaj institucioneve demokratike të Turqisë, “Ne kemi qenë dhe jemi pranë Turqisë në ditë të vështira”, ka thënë Juncker. Juncker mbrojti se BE mbështet demokracinë e qëndrueshme dhe suksesin ekonomik të Turqisë.
‘‘Një vit pas tentativës për grusht shteti, dora e Evropës është e shtrirë për Turqinë”, është shprehur Juncker, duke shtuar se “Evropa e ka shprehur një pikëpamje të tillë dhe pret nga Turqia që edhe ajo të shfaq diçka të tillë në drejtim të Evropës dhe t’i përshtatet vlerave Evropiane’’.
Juncker gjithashtu mbrojti se dëshiron afrimin dhe jo largimin e Turqisë nga Bashkimi Evropian dhe se të gjithë ata që kanë aspirata të integrohen në BE duhet të përshtaten me vlerat e Unionit duke paralajmëruar se “BE-ja do t’ia mbyll dyert Turqisë në qoftë se qeveria turke miraton dënimin me vdekje”
Juncker është shprehur se me presidentin e Turqisë Recep Tayyip Erdogan vazhdojnë të shkëmbejnë mendime të hapura dhe korrekte rreth kësaj dhe çështjeve të tjera, “Ne kemi rënë dakord që hap pas hapi të thellojmë bashkëpunimin tonë në fusha si energjia, siguria dhe luftën kundër terrorizmit.” tha.
Juncker sqaron se së bashku mund të arrijnë të kenë suksese edhe në shumë gjëra të tjera dhe kjo duket qartë tek marrëveshja për refugjatët e firmosur mes BE-së dhe Turqisë.
Juncker tha se pas hyrjes në fuqi të kësaj marrëveshjeje numri i refugjatëve nga Turqia në Greqi është ulur me 97 për qind dhe në të njëjtën kohë pas muajit prill 2016 nga Turqi në Evropë janë dërguar më tepër se 7.600 refugjatë sirianë në mënyrë të rregullt dhe refugjatët sirian në Turqi janë mbështetur me 1.6 miliardë euro deri tani. Juncker deklaroi se janë duke punuar rreth hapave që do të hidhen në 12 muajt e ardhshëm me bindjen se hapat e vogla do të kenë efekt të madh.
TIRANA TODAY
