Ndërhyrja në kohë e patrullës së policisë, ka shmangur vrasjen e dy familjarëve të viktimave të një jave më parë. I riu i cili vrau prindërit e tij, ka thënë se do të vriste edhe vëllain dhe dajën e tij.
Këto janë detajet e reja, hedhur dritë nga uniformat blu në lidhje me 26-vjeçarin Qemal Sela, i cili pak orë pas kthimit nga Anglia, ekzekutoi me breshëri kallashnikovi nënën dhe babain.
Bëhet fjalë për bashkëshortët Flamur dhe Zeqimete Sela, përkatësisht 55 dhe 50-vjeç, mbi të cilët i riu zbrazi një karikator me plumba.
Burime të sigurta nga policia e Dibrës, kanë bërë me dije për “Gazeta Shqiptare” se autori i ngjarjes së rëndë, ndodhur në lagjen “Llixha” të qytetit të Peshkopisë ka deklaruar në momentin e arrestimit, do të vriste edhe vëllain dhe dajën e tij.
Autori i krimit makabër, ka debatuar ashpër me të atin sapo ka mbërritur në aeroportin e Rinasit. Sipas bluve, emigranti ka refuzuar të udhëtojë me babain që kishte dalë ta priste në aeroport me një taksi të prenotuar që në Peshkopi. Kjo për faktin se ai akuzonte prindërit e tij, se kishin prishur të gjitha paratë që ai kishte dërguar nga Anglia përgjatë 7 viteve emigracion, për të ndërtuar 2 hotele që shërbenin për personat që frekuentojnë llixhat e Peshkopisë.
