Garda e vjetër në Partinë Demokratike, duket sikur është lënë në harresë. Jozefina Topalli, Astrit Patozi, Majlinda Bregu, Arben Imami dhe një numër të tjerë demokratësh të pakënaqur, të japin ndjesinë sikur kanë dhënë “dorëheqjen”, e ndërsa Basha me Berishën po luajnë me të gjitha letrat brenda PD-së.
Këta personazhe, dikur ishin të mendimit se Basha ka marrë peng PD, ka grabitur garën, ka dhunuar statusin dhe ka hyrë në një farsë që vetëm me fjalën demokratike nuk ka lidhje.
Por edhe sot, ish-deputetja Majlinda Bregu, ende ia ka inatin kreut demokrat, Lulzim Basha, e për këtë nuk kursehet edhe në intervistat e saj, duke ia plasur në fytyrë mendimin e lirë.
E ftuar në “Kapital” në “Vizion Plus”, Majlinda Bregu nuk e ka kursyer talljen dhe shpërfilljen ndaj Bashës. Ajo është pyetur për kuotat gjinore në politikë, duke e cilësuar si një dëshmi e paturpësisë së kryetarit të PD-së, për të mos respektuar ligjin.
“Basha ka turpëruar PD, ka paguar per kuotat gjinore në PD vetëm të mos ketë gra. Kështu bliheshin gratë dikur. Shpresoj që ky problem të zgjidhet me reformën zgjedhore, në mënyrë që mosrespektimi i kuotës gjinore, të mos ndëshkohet me gjobë, por me mospranim të listës së kandidatëve për deputetë. Në politikë është koha për të ofruar më shumë cilësi. Mund të jenë shumë burrra që nuk meritojnë të jenë në politikë. Do të doja që gratë të sillnin cilësi, e jo kuota në politikë”, është shprehur më tej ajo.
Duke qëndruar në të njëjtën linjë, Bregu ka shtuar edhe dozat e ironisë kundrejt Bashës, duke mos e përfillur fare. Mesa duket, ai nuk e ka uruar për postin e ri, e për këtë ajo ia kthen me të njëjtën monedhë:
“Nuk më ka shqetësuar, nuk e pres, nuk e kërkoj, nuk më bëhet vonë. Urimin e pres nga miqtë. Ka kaq shumë hipokrizi rrotull, sa nuk më shqetëson fare kjo gjë”.
Tirana Today
