Eventi më i madh i futbollit Botërorë do të startojë ditën e sotme me ndeshjen Rusi-Arabia Saudite. Tifozët pritën me shumë ankth 4 vite, ose ditë nga ai gol i Mario Gotzes, që kurorëzoi Gjermaninë kampione të botës në sfidën finale me Argjentinën në “Brazil 2014”. Luhet eventi i 21 i futbollit dhe vendi organizator është Rusia. Në stadiumin “Luzhniki” të Moskës, do të zhvillohet ceremonia hapëse, që do të jetë një spektakël shumëngjyrësh për të gjithë të apasionuarit e lojës.
Të dyja kombëtaret në fakt vijnë në një moment aspak pozitiv. Rusia nuk ka arritur të fitojë në shtatë ndeshjet e fundit, teksa suksesi i fundit daton në tetorin e vitit të kaluar ndaj Koresë, ndërkohë Arabia Saudite ka humbur tri miqësore radhazi, megjithëse me rivalë të fortë si Italia, apo edhe Peruja. Të dy ekipet shpresojnë në një fitore të mundshme në stadiumin “Luzhniki”. Rusia nuk fiton në një Kupë Bote që nga viti 2002, ndërkohë që Arabia Saudite që nga Botërori i luajtur në ShBA në vitin 1994.
Asnjë kombëtare mikpritëse nuk ka humbur ndeshjen hapëse të Kupës së Botës. Duke prodhuar deri më tani gjashtë fitore dhe tre barazime për ekipet vendase. Rusia ka mirëpritur edhe më parë një Kupë Bote, por nën emrin e Bashkimit Sovjetik, duke barazuar 0-0 ndaj Meksikës në vitin 1970.
Formacionet e mundshme:
Rusia: Igor Akinfeev; Mario Fernandes, Fedor Kudryashov, Sergey Ignashevich, Yuri Zhirkov; Roman Zobnin, Daler Kuzyaev, Alan Dzagoev, Aleksandr Samedov, Aleksandr Golovin; Fedor Smolov
Arabia Saudite: Abdullah Al-Mayouf; Usamah Husawi, Omar Hosawi, Yasser Al-Shahrani, Mohammed Al-Barik; Abdullah Otif, Salman Al-Faraj, Yahya Al-Shihri, Taisir Al-Jassim, Salem Al Dosari; Fahad Al-Molad
