Drejtori i Organizatës Botërore të Shëndetësisë, Tedros Adhanom Ghebreyesus, deklaroi se vendet e pasura po vaksinojnë të rinjtë të cilët nuk janë shumë të rrezikuar nga Covid-19, teksa në vendet e varfra dozat po mbarojnë.
Duke e cilësuar një dështim global, Ghebreyesus tha se situata në Afrikë është po aq e rrezikshme sa përhapja në gjithë globin e variantit më ngjitës, Delta, shkruan NDTV.
“Bota jonë po dështon. Problem është furnizimi, thjesht na jepni vaksinat”, tha Drejtori i Përgjithshëm i OBSH-së, në një konferencë për media.
Më herët, OBSH ngriti alarmin se shumë nga vendet më të varfra që morën vaksinat Covid-19 përmes iniciativës Covax nuk kanë më doza për të çuar përpara fushatën e imunizimit
COVAX, programi i drejtuar nga aleanca e vaksinave GAVI dhe OBSH, ka shpërndarë 90 milion doza vaksinash COVID-19 në 132 vende, por është përballur me probleme të furnizimit që kur India pezulloi eksportet e vaksinave.
