Kryeministri Edi Rama ka vijuar komunikimin me qytetarët përmes rubrikës “Sy m’Sy” në rrjetet sociale, duke iu përgjigjur pyetjeve dhe kritikave mbi bonusin e pensionistëve, i cili hyn në fuqi sot (1 mars) dhe do të derdhet në llogaritë bankare të pensionistëve më 3 mars.
Një komentues e akuzoi qeverinë se ky bonus është dhënë tre muaj para zgjedhjeve të 11 majit për të siguruar votat e pensionistëve. Rama mohoi kategorikisht këtë pretendim, duke theksuar se bonusi është pjesë e një përpjekjeje të vazhdueshme për mbështetjen e kësaj kategorie.
“Votën e pensionistëve e kam pasur dhe e kam si vlerësim për punën nga njerëz që kanë jetuar me punë dhe që punës i dinë vlerën. Me reformën e pensioneve, kemi bërë që ata që dalin në pension pas reformës të marrin një pension dinjitoz, ndërsa për të tjerët po përpiqemi me rritjen e bonuseve dhe me reformën e re që po hartojmë,” u shpreh Rama.
Në një koment tjetër me ironi, ku thuhej se qeveria është “harxhuar shumë”, kryeministri u përgjigj se bonusi nuk është një sakrificë, por një mundësi e krijuar falë zgjerimit të ekonomisë në vitet e fundit.
“Pensionistët e kuptojnë më mirë se të gjithë vlerën e kësaj përpjekjeje. Bonusi i dytë brenda gjashtë muajsh është një shenjë dashurie, respekti dhe përulësie ndaj tyre,” tha Rama.
Kryeministri shtoi se kjo ndihmë nuk është e mjaftueshme për të përmbushur të gjitha nevojat, por është një hap i rëndësishëm që vjen si rezultat i përmirësimit të ekonomisë. Ai theksoi se pensionistët do të jenë ata që do të japin përgjigjen më të mirë për këto masa më 11 maj, duke i bërë thirrje komentuesve të mos bien pre e “llumit të kënetës”.
