Një ngjarje e rëndë është shmangur në orët e para të mëngjesit të sotëm në lagjen “Kastriot” të Fierit, ku një bombul gazi rrezikoi të shpërthente në një pallat trekatësh, duke vënë në alarm të gjithë zonën.
Rreth orës 08:00, të ditës së sotme në katin e tretë të pallatit, një bombul gazi ka marrë flakë, duke shkaktuar panik në familjen banore dhe te fqinjët përreth. Gruaja e shtëpisë, e cila ndodhej në ambientet e banesës, ka arritur ta diktojë në kohë zjarrin dhe ka ndërhyrë për ta shuar, por ka pësuar djegie në fytyrë gjatë përpjekjes për të mbyllur saracineskën e bombulës. Për shkak të dëmtimeve, nuk ka mundur ta ndërpresë rrjedhjen e gazit.
Menjëherë pas sinjalizimit, në vendngjarje mbërritën dy mjete zjarrfikëse, ambulanca dhe forcat e policisë. Zjarrfikësit kanë ndërhyrë duke thyer dritaret për të ajrosur ambientin, ndërkohë që banorët e pallatit janë evakuuar me urgjencë për të shmangur rrezikun e një shpërthimi të mundshëm. Situata ishte tepër e rrezikshme, pasi edhe një shkrepëse e thjeshtë mund të shkaktonte tragjedi.
Policia njoftoi edhe drejtuesit e mjeteve pranë zonës që të mos ndiznin motorët, pasi era e gazit ishte përhapur në të gjithë perimetrin përreth.
Pas një operacioni të kujdesshëm, zjarrfikësit arritën të neutralizonin situatën dhe të largonin bombulë. Gruaja e plagosur u transportua menjëherë në Spitalin Rajonal të Fierit, ku po merr ndihmë mjekësore. Burime spitalore konfirmojnë se ajo ndodhet jashtë rrezikut për jetën, megjithatë ka marrë plagë djegëse në fytyrë.
Policia po heton për të përcaktuar shkaqet e saktë të incidentit dhe për të zbuluar nëse bombula kishte probleme teknike apo është shkaktuar nga pakujdesia në përdorim.
