Vetëm 7 kilometra larg qytetit të Korçës, fshehur mes kodrave dhe gjelbërimit të dendur, ndodhet Boboshtica – një nga destinacionet më të veçanta turistike të Shqipërisë së Juglindjes.
E mbushur me histori, tradita, shije dhe mikpritje, Boboshtica është shumë më tepër se një fshat i zakonshëm. Sipas dëshmive të kohës, Boboshtica numëronte 80 shtëpi dhe 200 mana dhe shumë taverna. Historia e thellë e fshatit është burim krenarie për banorët vendas, të cilët, edhe pse gjithnjë e më të rralluar, vazhdojnë të mbajnë gjallë shpirtin e komunitetit.
“Boboshtica është një fshat shumë i vjetër, dikur me 300-400 familje, ndërsa sot ka shumë pak familje se njerëzit shtegtuan, ikin nëpër Evropë”, tha Mihallaq Bambulli, banor i fshatit.
Boboshtarët kanë një shprehje që lidhet me rakinë e manit kur thonë”: “Tokni gotat me raki mani dhe buzëqeshini jetës”. Ky ritual i vogël, por kuptimplotë, hap rrugën drejt një udhëtimi ndryshe. Sepse rakia e manit është simbol i mikpritjes boboshtare, dhe ndoshta edhe çelësi i humorit të mirë që banorët ruajnë. “Rakia e manit është një element që na përfaqëson në të gjithë tregun, në të gjithë Shqipërinë dhe botën. Në mundohemi shumë që ajo të qëndrojë në cilësinë e parë të saj”, tha Olsi Melko, operator turistik.
Sot, edhe pse shumë banorë kanë emigruar dhe fshati është rralluar, Boboshtica jeton mes kujtimeve dhe shpresës. Dhe ndërsa të moshuarit presin me mall të afërmit në kthim, e kanë gjetur sekretin e lumturisë në një formulë të thjeshtë: “Pini raki mani, e buzëqeshini jetës!”
