Sot seanca parlamentare ka nisur me debate të forta mes deputetëve të mazhorancës dhe deputetit Ben Blushi.
Nga foltorja e seancës plenare Blushi ka ironizuar titullin e akorduar Kryeministrit Rama dje në Francë.
Duke komentuar këtë titull Blushi tha se Rama u soll mirë si emigrant në Francë por në Shqipëri është komandant i Legjionit të turpit.
Ben Blushi: “I dhanë Legjionin e nderit sepse në Francë është sjellë mirë si emigrant. Në Shqipëri hyri në Legjionin e turpit si kryeministër me Mark Frrokun, Vangjush Dakon, Elvis Rroshin.
Në mungesë të vetë Kryeministrit Edi Rama nga foltorja për t’iu përgjigjur Ben Blushit shkuan dy ministra Ditmir Bushati dhe Mimi Kodheli
Mimi Kodheli: Do vetëm të bëhesh protagonist. Eshtë për të ardhur keq që çdo të enjte bën parimorin dhe hedh baltë mbi ish kolegët e tu.
Nuk e bën thjesht për parime.
Pasioni i madh për të pasur portofolin e ministrisë së Mbrojtjes , por kjo nuk është justifim. Kam menduar se do vijë dita të bëhesh politikan serioz por nuk bëhesh dot sepse mllefi nuk do të lërë të bësh atë.
Kujt ia bën shokëve të tu prej 20 vitesh? Harron moralin Beni! S’të kam parë të shkruash një ligj.
Ke shkruar 5 libra po për veten tënde. Ti nuk ke shokë. Ndjekës jo e jo. E kam të vështirë të besoj se do të bëhesh ndonjëherë udhëheqës i PS-së. Në libra po, në realitet nuk besoj. Sot më zhgënjeve sërish. Ke rënë në batakun e Saliut. Keqardhje do të kesh nga të gjithë ne.
Ditmir Bushati: Shpresoj shumë që të ketë qenë një cinizëm nga pakujdesia mënyra degraduese mënyra si i kualifikove emigrantët shqiptarë. Të kam dëgjuar këtu që ke derdhur lot krokodile për votën e tyre, ke folur edhe në Athinë për të drejtën e tyre dhe ke shigjetuar kush të ka dalë përpara se pse nuk i jepet e drejta e emigrantëve për të votuar.
Gjuha paragjykuese ndaj tyre, gjuha cinike ndaj tyre është e papranueshme në këtë sallë dhe për ne, sepse për fat të keq bëhet pjesë e lojërave politike në mënyrë të padrejtë.
