Situata në Maqedoni vijon të jetë e bllokuar sa i përket zgjedhjes së kreut të ri të Parlamentit dhe më pas krijimin e qeverisë së re nga ana e shumicës parlamentare të përbërë nga Lidhja Social-Demokrate e Maqedonisë (LSDM), Bashkimi Demokratik për Integrim (BDI) dhe Aleanca për Shqiptarët. Kjo për shkak të zgjatjeve përmes pengesave proceduriale të shfaqura nga VMRO-DPMNE-ja e Nikola Gruevskit.
LSDM-ja, nga foltorja e Kuvendit në ditën e 10 të diskutimeve në seancën konstituitive, tha se deputetët e partisë së Gruevskit do të vazhdojnë të mos e përfillin rregulloren e punës së institucionit ligjvënës, duke bllokuar kështu zgjedhjen e kryeparlamentarit, derisa të marrin garanci “një fletë të bardhë ku të shkruhet amnistimi i Nikola Gruevskit për krimet që ka bërë”.
“Bllokimi i zgjedhjes së kryetarit të Parlamentit të Maqedonisë ka për qëllim që të mbrojë të gjithë ata që kanë kryer aktivitete kriminale. Dhe më e keqja është se vazhdohet ende me krim, përmes shpalljes së tenderave në formë joligjore. Tani zhvillohet beteja për shpëtimin e Maqedonisë nga vjedhja e paskrupullt e atyre që e kanë uzurpuar prej vitesh shtetin”, ka theksuar deputetja e LSDM-së, Radmilla Shekerinska.
Sipas saj, demokracia në vend po shkelet, sepse VMRO-DPMNE nuk dëshiron ta përfillë shumicën parlamentare, nuk dëshiron të shkojë në opozitë për shkak se nuk i ka numrat, si dhe t’i çlirojë institucionet nga uzurpimi partiak.
Nga ana tjetër, deputetët e VMRO-DPMNE-së vazhdojnë ta fokusojnë debatin në funksion të mbrojtjes së shtetit nga implementimi i “platformës së Tiranës”, të firmosur nga partitë politike shqiptare, përmes së cilës Zoran Zaev dëshiron të bëhet kryeministër.
“Që të mos kemi destabilizim të shtetit, të mos kemi probleme e trazira, ka një zgjidhje të thjeshtë. Ajo është shpalosja e gjithçkaje për të cilën është arritur akord në Tiranë. Qytetarët duhet të jenë të informuar. Kërkojmë të shkohet sërish në zgjedhje dhe ajo platformë të marrë edhe pëlqimin e qytetarëve, e pastaj Zaevi të bëhet kryeministër, nëse arrin të fitojë zgjedhjet dhe jo duke premtuar energji më të lirë, rritjen e pagës minimale ose heqjen e testimit të jashtëm për nxënësit e shkollave të mesme dhe atyre fillore. Nuk duhet të futet në pushtet përmes platformës së një shteti të huaj”, ka theksuar Ilia Dimovski, deputet i VMRO-DPMNE-së.
