Gazetari Blendi Fevziu ka përkujtuar ish-ministrin e Mbrojtjes, Luan Hajdaraga, i cili para disa vitesh ndërroi jetë. Teksa po flitej për motorët vespa, Fevziu përmendi se Hajdaraga ka qenë ndër të parët në Tiranë që lëvizte me të.
Kështu që ai i kërkoi publikut një duartrokitje për Hajdaragën, i cili ka mbajtur disa poste të rëndësishme në qeveri, por ka qenë edhe një prej miqve të emisionit “Opinion” derisa ndërroi jetë.
“Dua një duartrokitje nga publiku për Luan Hajdaragën, ish-drejtori i Institutit Pedagogjik, ish-ministri i Mbrojtjes së Republikës së Shqipërisë, ish-ushtruesi i detyrës së ministrit të Jashtëm.
Ka ndërruar jetë pak vjet më parë, por ka qenë një prej miqve më të vjetër të emisionit, që prej emisionit të parë “Opinion”, 31 Gusht të vitit 1997. Gjer në emisionin e parë dhe deri ditën që ndërroi jetë ka qenë i pranishëm në studio. Një duartrokitje për të”, u shpreh Blendi Fevziu.
Luan Hajdaraga humbi jetën në vitin 2018 pas një ishemie cerebrale në tru. Ai la pas një karrierë të pasur akademike dhe politike pasi ishte një nga figurat më të spikatura të politikës shqiptare pas viteve ’90.
