Në Elbasan po ndërtohet monumenti më i madh me portretin e Skënderbeut. Monumenti është akoma në ndërtim dhe po realizohet nga skulptori Fiqiri Kasa.
Biznesmeni Gjergji Luca është financuesi i kësaj vepre. Ai bëri të ditur sot se në vendin që po ndërtohet monumenti i Skënderbeut do të krijohet një park me monumentet e figurave të ndritura të kombit shqiptar.
Monumenti i Skënderbeut është 8 m i lartë, nëse matet nga baza mbi tunelin në të cilin ai ndodhet, atëherë ky monument është mbi 20 m i lartë duke qenë kështu njëkohësisht edhe monumenti më i lartë në Shqipëri.
Në vitin e Skënderbeut qeveria e kryeministrit Edi Rama akoma nuk ka ndërmarrë ndonjë iniciativë për të ndërtuar ndonjë objekt apo vepër për nder të kësaj figure kombëtare.
Pas Skënderbeut do të vijnë Ismail Qemali, Nënë Tereza, Kristoforidhi etj, shkruan infoelbasani. Një panteon që i mbledh gjithë këta emra të gjithë tok duke e kthyer në të ardhmen në një vend pelegrinazhi për shqiptarët kudo që ndodhen si dhe turistëve nga mbarë bota.
